La Bibia piemontèisa/Testament Neuv/Ebreo/Ebreo 3

←Ebreo 2

La Bibia piemontèisa Litra a j'Ebreo

Ebreo 4→

La Bìbia piemontèisa - Ebréo 03

Litra a j’Ebreo

3

Gesù Crist, grand sacerdòt degn ëd fiusa

¹Vojàutri, donca, frej e seur, pòpol sant ch'i pije part a na vocassion dël cel, penseje bin^[1] a cost Gesù, ch'i confessoma esse col che Nosgnor a l'ha invià^[2] e 'l grand sacerdòt ëd la fede ch'i professoma. ²Chiel a l'é stàit dël tut fidel a Nosgnor ch'a l'ha consacralo^[3], pròpi coma Mosè che, cand ch' a l'é staje fidà la ca antrega 'd Nosgnor, a l'é dimostrasse degn ëd fiusa^[4]. ³Ma Gesù a mérita motobin ëd pì 'd glòria che Mosè, pròpi coma col ch'a fabrica na ca a mérita motobin pì 'd làude che la ca midema, ⁴përchè tute le ca a l'han cheidun ch'a-j fabrica, ma 'l fabricant ëd tute le còse a l'é Dé. ⁵Mosè a l'é stàit bin degn ëd fiusa ant la ca 'd Nosgnor coma 'n servitor. Soa euvra a l'era n'ilustrassion ëd le vrità che Nosgnor a l'avrìa arvelà pì tard. ⁶Ma 'l Crist, sicoma ch'a l'é 'l Fieul ëd Dé, a l'ha la responsabilità dla ca antrega. Costa ca-sì i soma nojàutri, a condission ch'i përsistoma a d'avèj coragi e i seguitoma a esse fidej a nòstra speransa ant ël Crist.

Esposission dël Salm 95: Scoté la Paròla 'd Nosgnor con fede

⁷A l'é për lòn che lë Spirit Sant a dis: "Ancheuj, s'i sente soa vos, ⁸andurì nen vòstri cheur, coma ch'a l'ha fàit Israel cand ch'a l'é arvirasse, ant ël dì dla preuva ant ël desert. ⁹A l'é là che ij vòst antich a l'han butà a la preuva mia passiensa, bele s'i l'avìo vëddù ij mè miracoj për quarant' agn. ¹⁰Parèj i son anrabiame^[5] contra 'd lor e i l'hai dit: 'An sò cheur lor a scarto sèmper. As arfudo 'd fé l'òn ch'i-j diso'. ¹¹Parèj, ant mia rabia, i l'hai giurà: 'A intreran pì nen an mè leugh d'arpòs^[6]'".

¹²Mè frej e seur, pijé bin varda ch'a-i sia pa an cheidun ëd vojàutri un cheur gram ch'a chërda nen e ch'as arvira contra 'l Dé ch'a viv. ¹³Ma esorteve l'un l'àutr ògni dì mentre ch'a l'é ancora 'l dì d'ancheuj, për tëmma che cheidun ëd voi as andurissa contra Nosgnor për motiv ëd la sedussion dël pecà. ¹⁴Përchè s'i restoma fidej fin-a a la fin con l'istessa fede ch'i l'avìo la prima vòlta ch'i l'oma chërdù, i pijeroma part a tut lòn ch'a l'é dël Crist. ¹⁵Arcordeve 'd lòn ch'a l'é dit: "Ancheuj s'i sente soa vos, andurì nen vòstri cheur coma ch'a l'ha fàit Israel cand ch'a l'é arvirasse^[7]". ¹⁶E chi ch'a j'ero coj ch'a son arvirasse contra 'd Nosgnor, bele s'i l'avìo bin sentì soa vos? J'ero-ne fòrsi nen ël pòpol che Mosè a l'avìa portà fòra da l'Egit? ¹⁷Chi ch'a j'ero coj ch'a l'avìo fàit anrabié Nosgnor për quarant' agn? J'ero fòrsi nen col pòpol ch'a l'avìa pecà, dont ij cadàver a son restà peui ant ël desert? ¹⁸E a chi Nosgnor parlava-lo cand ch'a l'ha giurà ch'a-j avrìa fàit pi nen intré ant ël leugh ëd sò arpòs? J'er-lo pa lor 'l pòpol ch'a l'ha nen vorsulo scoté^[8]? ¹⁹Parèj i vëddoma ch'a l'han nen podùje intré për motiv ch'a l'han chërduje pa.

Nòte

1. O "fissé lë sguard an Gesù".
2. O "l'apòstol".
3. O "stabililo"
4. O "a l'ha servì fidel". Cfr. Nùmer 12:7.
5. O "I son ëstait dësgustà 'd cola generassion".
6. 3:7-11 cfr. Salm 95:7-11.
7. Cfr. Salm 95:7-8.
8. 3:16-18 cfr. Nùmer 14:1-35