Rino Serra/Le fior dël mal/052
LII. La bela nav
modifichéOh còtia 'ncantatris, mi i veuj contete,
Dle vàire blësse che toa gioventù sà soagnete;
Veuj disegné toa blëssa,
Doa l'infansia a s'uniss a la saviëssa.
Cand it vadi bogiand l'aria con tò cotin largh,
Ti 't fas l'efet d'un bel vassel ch'a pija 'l largh,
Carià 'd tèile e an roland
A seguita 'n ritm doss, meusi e pitòst bland.
An sël tò còl largh e tond, su toe gròsse spale,
Toa testa 's pavonegia con grassie dròle;
Con aria pasia e trionfanta
Ti 't tire anans, maestosa infanta.
Oh còtia 'ncantatris, mi-i veuj contete,
Dle vàire blësse che toa gioventù sà soagnete;
Veuj disegné toa blëssa,
Doa l'infansia a s'uniss a la saviëssa.
Tò sen fra la stòfa a s'avansa 'n possand,
Tò sen a l'é n'armari motobin bel e trionfant
E ij panej ciàir e bombà
Angancio ij ciairor coma në scu argentà.
Scu provocant e bin armà 'd ponte reusa!
Armari për doss segret, pien ëd minca còsa,
Ëd vin, ëd përfum e 'd licor
Ch'a fan deliré sia ij servej che ij cheur!
Cand it vadi bogiand l'aria con tò cotin largh,
Ti 't fasi l'efet d'un bel vassel ch'a pija 'l largh,
Carià 'd tèile e 'n roland
A seguita a ritm doss, meusi e pitòst bland.
Toe gambe nòbij sota 'l vestì ch'a sta volassand,
A tormento desideri sombr e a-j van cissand,
Coma doe strìe ch'a fan viré
Un filtro nèir ant un vas che përfond a l'é.
Tòi brass ch'a pudrìo pìesse dj'Ercuj novej
Gieugh, lor a son di boa lusent dij rivaj, ij mej,
Fàit për ëstrenze si fòrt e tant,
Coma për ëstampé andrin a tò cheur, tò amant.
An sël tò còl largh e tond, su toe gròsse spale,
Toa testa 's pavonegia con grassie dròle;
Con aria pasia e trionfanta
Ti 't tire anans, maestosa infanta.