La Bibia piemontèisa/Testament Vej/Salm/Salm 60

←Salm 59

La Bibia piemontèisa Salm

Salm 61→

Ij Salm

La Bìbia piemontèisa - Salm 060

60. Nosgnor! It l’has arpossane e sbërgiairane

'Ël Salmista a ringreta l’umiliassion ëd la dësfàita d’Israel, ma cora ch’a sent le paròle sicurante ‘d Nosgnor, chiel a sùplica che Dé a-j giuta an bataja e a manifesta soa fiùsa ant la vitòria.

¹Pr’ ël diretor dël còro: un Salm ëd David ch’a va bin për dotriné, riguard al temp che David a combatìa contra j’Aramé ‘d Naaraim e ‘d Sobà, e cand che Gioab a l’é tornà e a l’ha butà an derota dódes mila Edomita ant la Val ëd la Sal^[1]. Da cantesse conform al ton ëd “Liri dla testimoniansa”

Nosgnor! It l’has arpossane e sbërgiairane. It ses anrabiate contra ‘d nojàutri, ma ora ristabiliss-ne an tò favor. ²It l’has socrolà nòstra tèra e ‘d chërpure a son dovertasse. It suplicoma: torna a rangela, dësnò tut a crovrà. ³It l’has sogetà toa gent a ‘d preuve motobin dure, it l’has ambëriacalo con ël vin ch’it l’has daje da bèive. ⁴Ma për ij tò fedej it l’has alvà ‘n drapò për feje vëdde ‘l leugh anté ch’a peudo trové na sosta da j’atach dij nemis. [Intërludi]. ⁵Donca, lìbera coj ch’it-j veule bin. Salv-ne con toa potensa^[2]! Rëspond-ne!

⁶La promëssa che Nosgnor a l’ha fane an soa santità^[3] a l’é: “I stravincerai! I spartirai Sichem e mësurerai la val ëd Sucòt. ⁷Ghilead a l’é mia, a l’é mè Manasse. Efraim a l’é l’elm ch’am quata. Giuda a l’é mia cavija regal. ⁸Moab a l’é tanme mè bassin për laveme; i farai che Edom am serva^[4]. I alverai ‘d crij ëd trionf dzora dla Filistìa”.

⁹Chi é-lo ch’am mnerà a la sitadela fòrta? Chi é-lo ch’am farà vagné Edom? ¹⁰Pròpi ti, Signor, ch’it l’avìe arpossane e ch’it surtie pa pì a combate con ij nòstri armà.

¹¹It suplicoma: giutne contra ij nòstri nemis, përchè l’agiut ch’i podrìo arsèive da j’òm a serv pròpi a nen. ¹²A l’é con l’agiut potent ëd Nosgnor ch’i faroma grand 'mprèise: pròpe chiel a prostrà ij nòstri nemis.

Nòte

1. Cfr. 2 Samuel 8:13; 1 Crònache 18:12.
2. Let. “con tò brass”.
3. O “da sò santuari”.
4. Ebr. “dzora d'Édom i camperai mie sàndole”. A l'é nen ciàir lòn ch'a veul dì costa espression. Cheidun a la rèputa idiomàtica për dì: "pijè possess ëd". D'àutri a viro עַל (ʿal) coma “a” e a lo capisso coma campé le sàndole a 'n serv përchè a-j gava la póer".