La Bibia piemontèisa/Testament Vej/Salm/Salm 61

←Salm 60

La Bibia piemontèisa Salm

Salm 62→

Ij Salm

La Bìbia piemontèisa - Salm 061

61. Nosgnor! Scota mè crij!

Ël Salmista a leva ‘n crij d’agiut anvers ëd Nosgnor e a dà espression a soa fiusa che Dé a lo scotrà e a lo guernrà.

¹Pr’ ël diretor dël còro: un Salm ëd David, da companiesse con dë strument a còrda. Nosgnor! Scota mè crij! Fà ‘tension a mia sùplica. ²A l’é da la tèra la pì lontan-a che, an mia dësperassion^[1], i levo mia vos për ciamete agiut. It në prego: ménme a la fortëssa anté ch’i peuda stërmeme, ³përchè a l’é ti ch’it ses mia sosta, la fortëssa che ij mè nemis a peudo nen riveje. ⁴Che mi i peuda sté për sempe a ca toa^[2], sicur a l’arpar ëd toe ale! [Intërludi].

⁵Ti, Dé mè, it l’has ëscotà mie promësse^[3], it l’has acordame l’ardità arzervà a coj ch’a riverisso^[4] tò nòm. ⁶Acòrda al rè na vita longa! Che ij sò agn a së slongo për tante generassion. ⁷Ch’a peuda vive sota la protession ëd Dé per sèmper, e a lo guerna tò amor fedel. ⁸Antlora i podrai canté an onor ëd tò nòm për sempre, e dì apress dì compì lòn ch’i l’avìa promëttute.

Nòte

1. O “mentre mè cheur am dà ‘d mancament.
2. O “an tò santuari”.
3. O “ij mè vot”.
4. O “ch’a l’han tëmma”.