La Bibia piemontèisa/Testament Vej/Salm/Salm 30

←Salm 29

La Bibia piemontèisa Ij Salm

Salm 31→

La Bìbia piemontèisa - Salm 030

Ij Salm

30. Nosgnor! A l’é con gòj granda ch’it magnìfico

Ël Salmista a ringrassia Nosgnor pr’ avèjlo liberà da la mòrt e a cissa d’àutri a unisse a chiel ant la làuda. A l’ha fàit esperiensa pr’ un pò ‘d temp dj’assion dissiplinàrie ‘d Nosgnor, ma cand ch’a l’ha ciamaje d’agiùt, Nosgnor a l’é antërvnù e l’a ristabilije sò favor.

¹Un salm ëd David. Un cant për la dedicassion dël templi. Nosgnor! A l’é con gòj granda ch’it magnifico: it l’has tirame fòra da l’eva e it l’has pa consentì che ij me nemis a s’arlegrèisso ‘d mia derota. ²Nosgnor, mè Dé, i l’hai ciamate d’agiùt e ti tl’has ristabilime an salute. ³It l’has tirame fòra da la tomba^[1], Nosgnor, it l’has ampedime ch’i tombèissa ant la tampa dla mòrt.

⁴Fidèj ëd Nosgnor, canté an sò onor; laudelo e ten-e da ment che sò nòm a l’é sant! ⁵Sò rigor a dura mach un moment, ma sò favor a dura për tuta na vita! As peul bin pioré për tuta la neuit, ma a la matin a artorna la gòj.

⁶Cand ch’i j’era al sicur^[2] i pensava: “I podrai mai tombé”. ⁷A l’é tò favor ch’am rend frem tanme na montagna, ma cand ch’it l’has virame le spale, i në son ëstàit ëstravirà. ⁸Nosgnor! I l’hai anvocate, i l’hai suplicà mè Dé. ⁹I l’hai dije: “Che vantagi podries-to mai avèj da mia mòrt, s’i spërfondo ant la tampa? Podria-la mia póer laudete? Podria-la conté ‘d toa fidelità? ¹⁰Scotme, Nosgnor, e àbie misericòrdia ‘d mi. Nosgnor! Giutme!

¹¹Ti ‘t l’has cambià mè deul ant na dansa ‘d gòj. It l’has gavame mie vestimente ‘d deul e it l’has arvestime d'argioissansa. ¹²E lolì përchè mi i podèissa laudete e ch’i stèissa pa ciuto. Nosgnor, mè Dé! Mi it dirai mersì për sèmper!

Nòte

1. O “it l’has s-ciancame da la tèra dij mòrt”.
2. O “quand ch’i j’era ant la prosperità”.