La Bibia piemontèisa/Testament Vej/Salm/Salm 29
Ij Salm
modifiché29. Rende onor a Nosgnor
modifiché- Ant cost imn ëd làuda, l'autor a ciama tute le creature ch'a servo fedelment Nosgnor a rendje onor a la magnificensa real ëd Nosgnor. A fà peuj na descrission ëd Soa potensa devastanta coma ch'a l'é arvelà 'nt j'orissi, e a fortiss che Nosgnor a manifesta costa potensa afrosa e a benefissi 'd Sò pòpol. Ël contest orìginal ëd cost Salm a l'era na coragiosa polémica contra la divinità cananita pagan-a 'd Baal, dio dle tempeste. A fortiss ch'a l'é Nosgnor, ël ver Dé, ch'a l'é Rè e ch'a sta 'n contròl ëd j'element ëd la tempesta, nen lòn ch'a diso ij pagan. A l'é Chiel ch'a dà fòrsa a Sò pòpol e ch'a lo benediss.
1Rende onor a Nosgnor, voi ch'i seve ij sò fieuj[1], rende onor a Nosgnor për soa glòria e fòrsa! 2Rende onor a Nosgnor për la glòria 'd sò Nòm! Rende a Nosgnor l'adorassion për la magnificensa 'd soa santità[2]!
3La vos ëd Nosgnor a 'rson-a dzora dij mar. Ël Dé dla glòria a tron-a. Nosgnor a tron-a dzora dla fòrsa dël mar. 4La vos ëd Nosgnor a l'é poderosa! La vos ëd Nosgnor a l'é majestosa! 5La vos ëd Nosgnor a s-ciapa ij séder poderos. Nosgnor a s-ciapa ij séder dël Lìban.
6A l'é chiel ch'a fà sauté le montagne dël Lìban tanme 'd vailèt; a l'é chiel ch'a fà sauté 'l Mont Ermon tanme 'n bocin sarvaj. 7La vos ëd Nosgnor a frapa tanme la lòsna. 8La vos ëd Nosgnor a fà tramblé 'l desert; Nosgnor a socróla 'l desert ëd Cades. 9La vos ëd Nosgnor a stòrz le rol potente e a dëspeuja le foreste. Tut, ant sò templi, a crija: Glòria! 10A l'é Nosgnor ch'a dòmina an sj'aque dl’inondassion. Nosgnor a regna coma 'n Rè për sèmper.
11A l'é Nosgnor ch'a dà la fòrsa a sò pòpol. Nosgnor a lo benediss con la pas.
Nòte
modifiché- ↑ A fà riferiment dzortut a le creature dël cel, j'àngej, la cort ëd Nosgnor.
- ↑ 29:1-2 cfr. Salm 96:7-9