La Bibia piemontèisa/Testament Vej/Salm/Salm 96

←Salm 95

La Bibia piemontèisa Ij Salm

Salm 97→

Ij Salm

La Bìbia piemontèisa - Salm 096

96. Canté a Nosgnor un càntich neuv!

Ël Salmista a 'nvita tùit a laudé Nosgnor, ël sovran Creator dël mond ch'a dësfend e a manda anans ant ël mond la giustissia

¹Canté a Nosgnor un càntich neuv! Canté a Nosgnor, tuti vojàutri, j’abitant ëd la tèra! ²Canté a Nosgnor! Laudé sò Nòm! Nunsié tùit ij di la bon-a neuva dla salvëssa! ³Fé conòsse^[1] a tute le nassion la glòria 'd lòn che chiel a fà! ⁴Grand’ a l'é Nosgnor e franch degn d'esse laudà. Sò grandeur terìbil a fà vnì spàlid tùit j'àutri dé, ⁵përchè ij dé dj'àutre nassion a son ëd gnun valor, ma a l'é stàit Nognor ch’a l’ha fàit ël cel. ⁶Onor e majestà a j'ëstan dantorn, fòrsa e blëssa a 'mpinìsso sò santuari.

⁷Nassion dël mond, arconòsse Nosgnor! Arconòsse che Nosgnor a l'é glorios e fòrt! ⁸Dé a Nosgnor la glòria ch'a mérita! Porté vòstre oferte e vnì an soe cort. ⁹Adoré Nosgnor an tut sò splendor sant! Che tuta la tèra a tërmola dnans ëd chiel^[2]! ¹⁰Dì a tute le nassion: "Nosgnor a regna!". Ël mond a sta frem e a peul pa esse socrolà. Chiel a giudicrà ij pòpoj con giustissia^[3].

¹¹Che ij cej as arlegro e la tèra a 'rgiojissa! Ch’a crìja soe làude 'l mar e tut lòn ch'a-i é 'ndrinta! ¹²Che ij camp e ij mësson a sprìcio 'd gòj! Che tùit j'erbo dle foreste a argiojisso con ëd làude, ¹³përchè Chiel a l'é 'n camin ch'a ven. Chiel a ven a giudiché la tèra. A giudicrà 'l mond con giustissia e le nassion con soa vrità.

Nòte

1. O "conté".
2. Cfr. Salm 29:1-2.
3. O "con imparsialità", "a farà le còse giuste"