La Bibia piemontèisa/Testament Vej/Salm/Salm 140
Salm modifiché
140. Nosgnor! Salv-me dai malfasent modifiché
- Ël salmista a ciama a Nosgnor d’esse liberà dai sò nemis mortaj, a lo sùplica che sò giudissi ‘d condan-a a tomba dzora ‘d soa testa ‘d lor e a fortiss soa fiusa ant la giustissia ‘d Dé. .
1Al magìster dël còro, un salm ëd David. Nosgnor! Salv-me dai malfasent, guern-me da j’òm violent 2ch’a stan sempe lì a gabolé coma ch’a podrìo fé dël mal e a cissé ‘d guère, 3A l’han na lenga ch’a pica coma cole dle serp, e sota ij sò laver a-i é ‘d tòssi ‘d vipra[1]. (Antërludi).
4Nosgnor! Guern-me da le man dij pecador; ten-me lontan da coj ch’a vorìo antrapeme. 5Ëd gent maléfica a l’han ëstërmà ‘d trabucèt për feme tombeje ‘ndrinta; a l’han dëstendù na rèj për ciapeme; a l’han butà ‘d ciapòire pròpi ‘ndova ch’i son sòlit passé. (Antërludi)
6Mi i diso a Nosgnor: Ti ’t ses mè Dé. Nosgnor! Fà atension a la vos ëd mìe sùpliche. 7Nòsgnor, Ti ch’it ses sovran! Ti, ch’it ses col ch’a l’ha la fòrsa për libereme! It l’has butà në scu dzora ‘d mia testa për guerneme ant ël di dla bataja. 8Nosgnor! Acòrdje pa lòn che j’empi at ciamo an preghiera. Përmëttje nen ch’a l’àbio ‘n bon ésit l’ora ch’am ven-o contra a l’atach. 9A propòsit dij nemis ch’am ëstan dantorn - che ‘l mal mnassà da soa boca a-j ciapa lor midem. 10Che ‘d brasa anfiamà a tomba dzora ‘d soa testa. Che lor a sìo campà ant ël feu o an tampe pien-e d’eva, ch’a peulo pa ëscapeie. 11Che ij busiard a foson-o pa an nòst pais.
12I lo sai che Nosgnor a giuta coj ch’a son përseguità; chiel a farà giustissia ai pòver. 13Ëd sicur ij giust a rendran grassie a tò nòm; coj ch’a son giust e onest a staran an toa presensa.
Nòte modifiché
- ↑ Cfr. Roman 3:13.