La Bibia piemontèisa/Testament Vej/Sacaria/Sacaria 6

←Sacarìa 5

La Bibia piemontèisa Sacarìa

Sacarìa 7→

La Bìbia piemontèisa - Sacarìa 6

Sacarìa

6

Vision ch’a fà eut: ij quat chèr

¹Ant n’àutra vision i l’hai vëddù quat cher ch’a seurtìo d’an tra doe montagne ‘d bronz. ²Ël prim cher a l’era tirà da dòi cavaj ross^[1]; lë scond da cavaj nèir^[2]; ³ël ters da cavaj bianch^[3]; ël quart da cavaj vairolà e gris; a l’ero tuti ‘d cavaj fòrt. ⁴A l’àngel ch’a parlava con mi i l’hai anlora ciamaje: “Car ël mè signor, chi ch’a son coj-lì?”. ⁵L’àngel a l’ha rëspondume: “Coj-lì a son ij quat ëspirit dël cél^[4] ch’a seurto da la presensa dël Signor ëd tuta la tèra. ⁶Ël cher tirà dai cavaj nèir a l’é an camin d’andé al pais dël setentrion e ij cavaj bianch a-j van dapress, ma ij cavaj variolà a van anvers ël meridion.

⁷Tuti costi cavaj fòrt a l’avìo maitass d’andé a përcore la tèra e ‘l Signor a l’ha dije: “Andé a përcore la tèra”, e lor a l’han falo. ⁶Anlora ‘l Signor a l’ha ciamame e a l’ha dime: “Varda, coj ch’a van a setentrion a l’han pasià mè spirit, la sù a setentrion^[5].

Coronassion dij dòi onzù

⁹Nosgnor a l’ha adressame soa paròla. A l’ha dime: ¹⁰“Sern cheidun d’an tra j’esilià, visadì Heldai, Tobìa e Jedaia, ch’a son tuti tornà da Babilònia, e cand ch’it l’avras falo, va ti midem a ca ‘d Giosìa. ¹¹Peui pija d’argent e d’òr, fane na coron-a e butla an sla testa dël gran sacerdòt Giosuè, fieul ëd Iosadach. ¹²Dije: “Sossì a nunsia ‘l Signor ëd l’Univers: ‘Varda sì l’òm ch’a ciamo lë Smens^[6]; grassie a chiel tut a gicherà: ¹³a sarà chiel a arcostruve ‘l templi dël Signor; a sarà arvestì ‘d majestà, e as setrà tanme ‘n rè an sël tròno për governé. Pì ‘d lòn, a-i sarà ‘n sacerdòt con chiel an sò tròno, e an tra tùit e dòi a-i sarà pas e concòrdia. ¹⁴La coron-a a resterà ant ël templi 'd Nosgnor, coma na memòria an onor d’Heldai, ëd Tobìa e ‘d Jedaja. ¹⁵Coj ch’a son da leugn a vniran pr’ arcostruve ‘l templi 'd Nosgnor, e anlora i arconossreve ch’a l’é ‘l Signor ëd l’Univers ch’a l’ha mandame a vojàutri. Tut sossì as compirà s’i scotreve la vos dël Signor, vòst Dé.

Nòte

1. Cfr. Arvelassion 6:4.
2. Cfr. Arvelassion 6:5.
3. Cfr. Arvelassion 6:2.
4. O “ij quatr vent” cfr. Arvelassion 7:1.
5. A l’é la pas portà dai persian an Babilònia apress d’avèila conquistà, la pas ch’a l’avrìa përmëttù l’artorn a ca dj’Israelita  (cfr. 2 Crònache 36:22-23; Isaia 44:28; 45:1-2). Tutun, a-i è sì ‘dcò na dimension escatològica e as arferiss al temp ch’a-i sarà na pas përfeta daspërtut ant ël mond.
6. O “ël Branch”; cfr. Geremìa 23:5; 33:15; Sacarìa 3:8.