La Bibia piemontèisa/Testament Vej/Numeri/Numeri 15

←Numeri 14

La Bibia piemontèisa Nùmeri

Nùmeri 16→

Ij nùmer

15

Bìbia piemontèisa - Numer 15

Oferte ‘d gran, ëd vin e d’euli

¹Nosgnor a l’ha ancora parlà a Mosè. A l’ha dije: ²“Comùnica sossì a j’Israelita: ‘Cora che vojàutri i sareve intrà ant ël pais andova ch’i abitereve e che mi i l'hai dave, ³s’i presenteve al Signor n’oferta, pijela dai vòstri strop ëd vache, ëd feje o ‘d crave. A l’é n’oferta che ‘l feu a consuma, n’oferta d’odor agreàbil al Signor, tant s’a l’é n’olocàust che s’a l’é un sacrifissi ‘d comunion volontari, an compiment d’un vot o an ocasion ëd vostre feste comandà. ⁴Col ch’a presenta soa oferta al Signor, a l’ha da compagné la vìtima con tre chilo ‘d fior ëd farin-a ampastà con un lìter d’euli, ⁵e con na libassion d’un lìter e mes ëd vin, coma n’oferta d’odor agreàbil al Signor.

⁶Se la bestia a l’é ‘n babero, a-j giontrà n’oferta ‘d ses chilo ‘d fior ëd farin-a ampastà con un liter e mes d’euli, ⁷e na libassion d’un liter e mes ëd vin, coma n’oferta d’odor agreàbil al Signor.

⁸Se la bestia oferta an olocàust o an sacrifissi ‘d comunion a l’é dlë strop ëd vache, për compì un vot o për rende grassie al Signor, ⁹a-j giontrà n’oferta ‘d neuv chilo ‘d fior ëd farin-a ampastà con doi lìter d’euli, ¹⁰e na libassion ëd doi liter ëd vin, coma n’oferta d’odor agreàbil al Signor .

¹¹A l’é sossì ch’a l’ha da fesse për minca ‘n tòr, minca ‘n moton, minca n’agnel o cravòt smonù an sacrifissi. ¹² Conform ël nùmer ëd le bestie ch’a së smon-o, i giontreve l’oferta ch’a corispond a minca na vìtima.

¹³Tùit ij nativ Israelita a osserveran coste prescrission cand ch’a smonran n’oferta consumà dal feu an odor agreàbil a Nosgnor. ¹⁴Se ‘n foresté ch’a l’abia residensa temporànea an tra ‘d vojàutri o ch’a ‘parten-a a na famija stabilìa da chèica generassion, a vorerìa smon-e un sacrifissi che ‘l feu a consuma d’odor agreàbil al Signor, a l’ha da rispeté j’istesse prescrission. ¹⁵Për vojàutri coma comunità e pr’ ij foresté, la prescrission a l’é l’istessa. A l’é na prescrission ch’i l’eve da osservé an përpètuo da generassion a generassion. Dë 'dnans a Nosgnor, ël foresté a l’ha da rispetela l’istess che vojàutri. ¹⁶I osservereve l’istessa lege e l’istess ritual, tant vojàutri che ij foresté ch’a stan an mes ëd vojàutri^[1]”.

Le primissie dël pan

¹⁷Nosgnor a l’ha ‘ncora parlaje a Mosè. A l’ha dije: ¹⁸“Comunica sossì a j’Israelìta: ‘Cand ch’i ‘ntrereve ant ël pais anté ch’iv pòrto, ¹⁹e i mangereve ‘l pan ëd cola tèra, butene da banda na part pr’ ël Signor. ²⁰Da le primissie ‘d vòstra fornà, butene da part na fogassa, l’istess coma ch’i bute da banda le prime spi^[2]. ²¹Da generassion a generassion i butreve da banda pr’ ël Signor n’oferta dle primissie dla fornà.

Espiassion ëd le trasgression d’inavertensa

²²A peul capité che, sensa ‘ncorziss-ne, i l’eve mancà d’osservé ‘n chèich comandament che Nosgnor a l’ha dàit a Mosè, ²³l’é a dì, na prescrission qualsëssìa che Nosgnor a l’ha comandà pr’ ël mojen ëd Mosè përchè i l’osservèisse vojàutri e ij vòstri dissendent dal dì ch’a l’é stàita publicà.

²⁴Se la trasgression involontària a l’é stàita comëttùa da tuta la comunità, la comunità a l’ha da smon-e an olocàust un vailèt coma n’oferta d’odor agreàbil a Nosgnor, e a la compagnerà con l’oferta corispondenta ‘d farin-a e ‘d vin, conforma ch’a l’é stàit ëstabilì. A smonrà ‘dcò un boch an sacrifissi pr’ ël pëccà. ²⁵Ël sacerdòt a farà ‘l rit d’espiassion për tuta la comunità d’Israel, e la trasgression a lor a-j sarà përdonà. A l’han falo pa apòsta: a l’é për lòn che la comunità a l’ha presentà soa oferta, ch’ ël feu a la consumerà an onor ëd Nosgnor, e ‘l sacrifissi për la trasgression comëttùa ‘d manera 'nvolontària. ²⁶Tuta la comunità d’Israel a sarà përdonà, e ‘dcò ij foresté ch’a vivo an mes ëd lor, përchè la trasgression comëttùa ‘d manera 'nvolontària a l’era ‘d tuta la gent.

²⁷S’a l’é na sola përson-a che, sensa felo apòsta, a l’ha comëttù na trasgression, a l’ha da smon-e na crava 'd n'ann an sacrifissi pr’ ël pëccà. ²⁸Ël sacerdòt a farà ‘l rit d’espiassion ëd la përson-a ch’a l’ha comëttù na trasgression anvolontaria, e la trasgression a-j sarà përdonà^[3]. ²⁹Tant pr’ ël nativ israelita che pr’ ël foresté ch’a viv an mes ëd vojàutri, la lege për la trasgression comëttùa ‘d manera 'nvolontària a l’é l’istessa.

³⁰Tutun, chi ch’a comëtt na trasgression ëd manera deliberà, ch’a sia col-lì un nativ o ‘n foresté, a l’avrà oltragià Nosgnor. Na tal përson-a a sarà bandì da sò pòpol. ³¹A l’ha dëspresià la paròla ‘d Nosgnor e violà sò comandament. La colpa a l’é la soa, e për lòn a sarà bandì.

Violassion dël Saba, dì d’arpòs

³²Antramentre che j'Israelita a l'ero ant ël desert, a l'han trovà n'òm ch’a cujìa 'd bòsch ant un di 'd saba. ³³Coj che a l'avìo trovalo a fé sto travaj-lì a l'han portalo da Mosè, da Aron e a tuta la comunità. ³⁴A l’han tnilo sota sorvejansa fin ch’a fussa stabilì còsa che ventèissa feje. ³⁵Nosgnor a l’ha dije a Mosè: “Cost’òm a l’ha da esse condanà a mòrt. Che tuta la comunità a lo ciapa a prassà fòra dal campament”. ³⁶Anlora tuta la comunità a l'ha portalo fòra dël campament e a l'ha massalo a colp ëd pera: col-lì a l'é mòrt conform al comand che Nosgnor a l'avìa daje a Mosè.

Le frangie dël mantel

³⁷Nosgnor a l’ha dije a Mosè: ³⁸ Comunica cost’òrdin-sì a j’Israelita; ‘Che lor e ij sò dissendent as faso ‘d frangie an sle broe dij vestì^[4] con un fil ëd porpra violëtta. ³⁹Parèj, ant ël moment ch’i vardereve cole frangie, iv arcordereve ‘d tùit ij mè comandament, a-j osservereve e av lassereve pa dominé da j’anvìe ‘d vòst cheur o ‘d vòstri euj, ch’av porterio mach a l’idolatrìa. ⁴⁰Përparèj 'v n'avisereve'd tùit ij mè comandament, i-j butreve an pràtica e i sareve sacrà për vòst Dé. ⁴¹Mi i son ël Signor vòst Dé, che i l'hai fave seurte dal pais d'Egit për esse vòst Dé. Mi i son ël Signor vòst Dé.

Nòte

1. Cfr. Levitich 24:22.
2. O “conform al rit che as fà an sl'èira”.
3. 15:27-27 cfr. Levitich 4:27-31.
4. Cfr. Deuteronòmi 22:12.