La Bibia piemontèisa/Testament Vej/Levitich/Levitich 14

←Levitich 13

La Bibia piemontèisa Levìtich

Levìtich 15→

Levìtich

La Bìbia piemontèisa - Levitich 14

14

Purificassion legal dij malavi dla pel

¹Nosgnor a l’ha torna parlaje a Mosè. A l’ha dije: ²“Costa-sì a l’é la lege ch’a riguarda la përson-a ch’a l’é stàita diciarà lebrosa, ël dì ch’as presenta al sacerdòt^[1] pr’ esse purificà. ³Ël sacerdòt a seurtirà fòra dal campament e a la esaminerà. S’a rëscontra che la lebra a l’é sparìa, ⁴a comanderà ‘d pijé për la përson-a ch’a l’ha da purifichesse doi oslin^[2] viv ch’a sio pur, ëd bòsch ëd séder, ëd lan-a tenzùa dë scarlata e d’ìssop. ⁵Ël sacerdòt a darà ordin ëd dësgorzene un ansima a ‘n grilèt ëd tèra dzora d’eva viva ‘d sorgiss. ⁶Peui a ciaprà l’oslin viv, ël bòsch, ël pann e l'ìssop, e a-j mojerà ant ël sangh ëd l'àutr passaròt che a l'era stàit sgorzà an sl'eva viva. ⁷Set vire a farà aspersion dëdzor’ a la përson-a che a l'ha da esse purificà da la lebra, e apress d’avèjla diciarà pura, a lass-rà andé lìber për la campagna l'oslin viv. ⁸La përson-a ch’as purifica a l’avrà da lavesse soe vestimente ant l’eva, as raserà tùit ij pluch ëd ël còrp, as lavrà ant l'eva, e a sarà pur; peui a intrerà ant ël campament, ma a dovrà sté ancora na sman-a fòra 'd soa tenda. ⁹Ant ël dì ch’a fà set as tosonerà torna tùit ij pluch: dij cavèj, dël menton, ëd j’euj e dël rest ëd ël còrp. Peui a farà un bagn arzentand sò vestiari. Anlora a restrà pur.

¹⁰Ël dì ch’a fà eut a smonrà doi babero ch’a l’abio gnun difèt e, coma n’oferta, neuv chilo ëd fior ëd farina ampastà d’euli e, ëd pì, un quart ëd lìter d’euli. ¹¹Ël sacerdòt ch’a selebra la sirimònia ‘d purificassion a presentrà la përson-a ch’a l’é purificà e tute coste oferte dë 'dnans ëd Nosgnor, a l’intrada dla Tenda dël Rëscontr. ¹²Apress, ël sacerdòt a pijerà un dj’agnej destinà al sacrifissi ‘d riparassion ansema a ‘n quart ëd lìter d’euli, e a-j smon-rà dë 'dnans ëd Nosgnor. ¹³Peui a sgorzrà ‘l babero ant ël leugh sacrà anté ch’a së sgorzo le vìtime dël sacrifissi pr’ ël pecà përchè l'oferta pr’ ël pecà a l'é dël sacerdòt, parèj tanme l'oferta pr’ ël pardon: tut sòn a l'é sant dël gré pì àut, e a speta al sacerdòt.

¹⁴Fàit ch’a sia lolì, ël sacerdòt a ciaprà ‘d sangh ëd la vitima oferta coma riparassion ëd la colpa e a n’onzrà ‘l lov dl’oria 'd drita ‘d col ch’a l’é stàit purificà, ‘l pòles e ‘l dil gròss ëd ël pé, tùit e doj ëd drita. ¹⁵Peui a pijerà l’euli e a lo vërsrà an sla parmela dla man mancin-a. ¹⁶Ël sacerdòt a mojerà sò dìl mostrareul e a farà set aspersion d’euli dë 'dnans ëd Nosgnor. ¹⁷Con l’euli ch’a-j resta an man a onzrà ‘l lov dl’orija ‘d drita e an sël dil gròss sèmper ëd drita, pròpi andova ch’a l’era già stàit butà ‘l sangh ëd ël babero. ¹⁸Lòn ch’a-j restrà dl’euli drinta a soa parmela a lo butrà an sla testa ‘d la përson-a ch’a l’é purificà, e apress a farà ‘l rit d’espiassion dë 'dnans ëd Nosgnor. ¹⁹Ël sacerdòt a smonrà ël sacrifissi pr’ ël pecà e, a la përson-a ch’a l’é purificà, a-j farà torna ‘l gest ritual dl’espiassion. Fàit lòn, a sgorzerà la vìtima dl’olocàust. ²⁰Ël sacerdòt a smonrà ‘l sacrifissi complèt e l’oferta ‘d farin-a an sl’autar. Parèj ël sacerdòt a farà l’espiassion për col ch’a l’é purificà, e col-lì a restrà pur.

²¹Se la përson-a ch’a l’é purificà a l’é pòvra e a l’ha pa ij mojen për provëdde a tut sòn, ch’a ciapa mach n’agnel për smonlo coma na vìtima ‘d riparassion, ansema a tre chilo ‘d fior ëd farin-a ampastà con d’euli për l’oferta e ‘d pì un quart ëd lìter d’euli. ²²Ch’a ciapa ‘dcò doe cite tórtore o doi colombòt, conform a lòn ch’a podrà smon-e. Dij doi un a sarà pr’ ël pecà e l’àutr për l’olocàust. ²³Ël dì ch’a fà eut, a portrà coste oferte al sacerdòt për soa purificassion a l’intrada dla Tenda dël Rëscontr, dë 'dnans ëd Nosgnor. ²⁴Ël sacerdòt a pijerà l’agnel destinà al sacrifissi ‘d riparassion ansema al quart ëd lìter d’euli, e a lo smonrà dë 'dnans ëd Nosgnor. ²⁵Apress, a sgorzrà l’agnel ëd ël sacrifissi ‘d riparassion, a na pijerà ‘l sangh e a onzrà ‘l lov dl’orija ‘d drita, ël dil gròss ëd ël pé ‘d drita ‘d la përson-a ch’a l’é purificà. ²⁶Nopà, an sla parmela dla man gàucia, a-i darà 'l gir a tut l'euli, ²⁷e con ël dil ëd soa man drita a farà n’aspersion dl'euli che a l'è an soa man mancin-a, set vire dë 'dnans ëd Nosgnor. ²⁸Con l’euli ch’a-j resta an soa parmela a onzrà ‘l lov dl’orija ‘d drita, ël pòles ëd la man drita e l dil gross ëd ël pé ‘d drita ‘d la përson-a ch’a l’é purificà, l’é a dì, j’istess leugh anté che anans a l’avìa onzù con ël sangh dl’agnel smonù ant ël sacrifissi ‘d riparassion. ²⁹L’euli che ancora a l’ha an man, a lo vërserà dzora dla testa dla përson-a ch’a l’é purificà e apress a farà ël rit d’espiassion dë 'dnans ëd Nosgnor. ³⁰Peui, ël sacerdòt a ciaprà un-a dle tórtore o un dij colombòt conform a lòn ch’a l’avrà podù porté. ³¹Ëd lòn ch’ a l'avrà podù provëdde, un a sarà për ël pecà, e l'àutr për l'olocàust, con l’oferta ‘d farin-a; përparèj che 'l sacerdòt a farà la propissiassion dë 'dnans ëd Nosgnor për la përson-a ch'a l'é purificà. ³²Costa a l’é la lege për la përson-a ch’a l’era stàita diciarà lebrosa e ch’a l’ha pa ij mojen për smon-e lòn ch’a l’é prescrit për soa purificassion.

La mufa ant le ca

³³Nosgnor a l’ha torna parlaje a Mosè e a Aron. A l’ha dije: ³⁴“Cora ch’i sareve intrà ant ël pais ëd Canan che mi iv dago an proprietà, se mi i faso seurte n’antamnura ‘d mufa^[3] an na ca ‘d col pais ch’a sarà ‘l vòstr, ³⁵ël padron ëd ca a 'ndrà a trové ‘l sacerdòt e a-j farà savèj che a soa ca as vëdd coma n’antamnura. ³⁶Anlora ‘l sacerdòt a comandrà 'd dësbarassé prima la ca, anans che chiel a-i intra për esaminé l’antamnura; parèj ch’a-i sia gnun arzigh che tut lòn ch’a j’é ant la ca a dventa 'mpur. Apress a-i intrerà ‘l sacerdòt. ³⁷Se cora ch’a fà la disamina dla ca, ël sacerdòt a rëscontra ch’a-i é ‘d macie an sle muraje dla ca an fòrma ‘d cite tampëtte ch’a tiro an sël verd o an sël ross e ch’a sio pì ancreuse dël mur, ³⁸ël sacerdòt a ‘ndrà fin-a a la pòrta e a seurtirà da cola ca fasendla saré për na sman-a. ³⁹Ël dì ch’a fà set, a-i tornerà për fé na neuva disàmina e, s’a ‘rmarca che l’antamnura a l’é spantiasse për le muraje dla ca, ⁴⁰a ordinerà ‘d rancheje le pere antamnà e ‘d campeje fòra dla sità ant un leugh impur. ⁴¹Chiel a farà ‘dcò ras-cé j’arissadure dla ca 'd drinta e tut d’antorn e a l’avrà soen che tut l’ariss ras-cià a sìa campà ‘nt ël leugh ampur fòra dla borgià. ⁴²Peui a ciaprà d’àutre pere e as butran al pòst d le prime, e tuta la ca a sarà arissà con ëd material neuv. ⁴³Tutun, se l’antamnura a torna a ’mpesté la ca, dòp d’avèj rimpiassà le pere e apress d’avèj ras-cià e torna antonacà la ca, ⁴⁴anlora a andrà dal sacerdòt ch'a l’avrà da esaminela torna. S’a vëdd che ‘l mal a l’é estendusse për la ca, as trata ‘d n’antamnura corosiva^[4]. La ca a l’é 'mpura. ⁴⁵Anlora as drocherà la ca: le pere, ël bòsch e tuta la carpenterìa e soa arissadura a sarà trasportà ant un leugh ampur, fòra da la borgià. ⁴⁶Se cheidun a dovèissa intré ant na tal ca ‘ntant ch’a dura ‘l temp ëd l’esclusion, chiel-lì a sarà 'mpur fin-a a sèira. ⁴⁷La përson-a ch’a deurm e a mangia ant na ca përparèj a l’avrà da lavesse soe vestimente. Ëdcò chi ch'a dovèissa mangé an cola ca a arzentrà sò vestiari. ⁴⁸A l’opòst, se ‘l sacerdòt, cora ch’a intra ant la ca e a l’esàmina, a rëscontra che, apress d’avèila ancaussinà, ël mal a l’é pa nen estendusse, a diciarerà pura la ca, përchè ‘l mal a l’é dësparì.

⁴⁹Për ël rit ëd purificassion ëd la ca, ël sacerdòt a pijerà doi oslin, ëd ël bòsch ëd séder, ëd lan-a tensùa dë scarlata e d’ìssop. ⁵⁰A sgorzerà un dj’oslin ansima a ‘n vas ëd tèra ampinìa d’eva corenta. ⁵¹A ciaprà peui ël bòsch ëd séder, l’ìssop, la lan-a tensùa dë scarlata, e l’oslin viv, e a mojerà tut ant ël sangh dl’oslin sgorzà ansima a l’eva corenta e a në farà set aspersion ëd la ca. ⁵²A purificherà, donca, la ca con ël sangh dl’oslin e l’eva corenta, con l’oslin viv, ël bòsch ëd séder e la lan-a tensùa dë scarlata. ⁵³A lasserà peui andé l’oslin viv përchè ch’a vola lìber pr’ ij camp, fòra dla borgià. Apress a farà ‘l rit d'espiassion për cola ca, e a restrà pura.

Arcapitolassion

⁵⁴Costa-sì a l’é la lege për le diverse sòrt d’antamnure ‘d lebra e ‘d tignòle, ⁵⁵për j’antamnure ‘d mufa dij vëstì e dla ca, ⁵⁶pr’ ij tumor, ij bognon e le brosse lùcide; ⁵⁷con ël but ëd podèj determiné cand che le përson-e e le còse a son ampure o pure. Costa-sì a l’é la lege riguard ëd le diverse sòrt d’antamnure.

Nòte

1. Cfr- Maté 8:4; March 1:44; Luca 5:14; 17:14.
2. O “doi passaròt”.
3. O “lebra”.
4. O “ch’a rusia”.