La Bibia piemontèisa/Testament Vej/Isaia/Isaia 62

←Isaìa 61

La Bibia piemontèisa Isaìa

Isaia 63→

La Bìbia piemontèisa - Isaia 62

Isaia

62

Nosgnor a treuva Soa delissia an Sion

¹Pròpi përch' i veuj bin a Sion, i starai pa ciuto. Pròpi përch' i sosnisso Gerusalem, i peuss nen ëstemne chiet. I chitrai nen ëd preghé për chila fin-a a tant che soa giustissia a splendrà tanme 'l sol a primalba, e soa salvëssa^[1] a brusrà tanme 'n flambò afoà. ²Le nassion a vëdran toa giustissia. Tùit ij rè dël mond a saran sbalucà da toa glòria. A ti at sarà dàit un nòm neuv da la boca midèma 'd Nosgnor. ³Nosgnor a të tnirà an man parèj che tùit at vëddo - na coron-a splendrienta 'nt le man ëd Dé. ⁴Mai pì it saras ciamà "La sità bandonà" o "Tèra 'd desolassion". Tò nòm neuv a sarà: "Sità delissia 'd Nosgnor" e "La sposa 'd Dé", përchè an ti Nosgnor a treuva soa delissia e at vorerà tanme soa sposa.

⁵Ij tò fieuj a faran anvers ëd ti un giurament ëd fidelità, Gerusalem, pròpi tanme 'n giovnòt ch'as angagia con na giovna. Antlora 'l Signor a s'arlegrerà an ti tanme në spos ch'a s'arlegra 'd soa fomna. ⁶Gerusalem! I l'hai butà 'd vardie an sij tò murajon: lor a vijeran an preghiera neuit e di. Pijeve gnun arpòs, vojàutri ch'i pregheve Nosgnor. ⁷Dé a Nosgnor gnun-a requie fin-a a tant che chiel a finiss sò travaj, fin-a a tant che chiel a fasa 'd Gerusalem l'orgheuj ëd la tèra.

⁸Nosgnor a l'ha giurà a tuta fòrsa^[2]: "Mai pi it consignerai ai tò nemis. Mai pì a vniran dij guerié strangé për portete via tò forment e tò vin neuv. ⁹It ses ëstàit ti a coltivé 'l forment e ti 't lo mangeras ringrassiand-ne Nosgnor. Ant le cort dël Templ i sareve vojàutri a bèive 'l vin ch'i l'eve torcià. ¹⁰Seurte fòra dai porton e preparé la stra parèj che mè pòpol a peussa 'rtorné. Spiané le strà, gavé le pere d'antrap ch'a-i son, aussé 'n drapò parèj che tute le nassion a lo vëddo. ¹¹Nosgnor a l'ha mandà 's mëssagi a tùit ij pais: "Dì al pòpol d'Israel: Vardé: vòstr Salvator a l'é an camin ch'a riva. Vardé, chiel a pòrta 'dcò n'arcompensa^[3]".

¹²Lor a saran ciamà: "Ël pòpol sant", "Coj ch' ël Signor a l'ha riscatà". E Gerusalem a sarà ciamà: "Leugh ch'a l'é 'n piasì dë steie" e "La sità pì nen bandonà".

Nòte

1. O: "liberassion".
2. O: "Con Soa man drita e con Sò bras potent".
3. Cfr. Isaia 40:10; Arvelassion 22:12.