La Bibia piemontèisa/Testament Vej/Giosue/Giosue 16
Giosuè modifiché
16 modifiché
La tribù ‘d Giusèp modifiché
1Ël teritòri assegnà për sòrt ai dissendent ëd Giusèp, a 'ncaminava dal Giordan ëd Gérico, fin-a a j'aque 'd Gérico anvers orient, ch'a l'é 'l desert; an montand da Gérico për la montagna fin-a Betel. 2E costa frontiera da Betel a rivava a Lus[1], an passand da Atarot, andova ch'a vivìo j'Archita. 3Peui a calava an dëssendend anvers l'ossident, ai finagi dj'Iafletita, fin-a a le borne 'd Bet-Oron bassa. Da là a rivava a Gheser e a finìa ant ël Mar Gròss. 4A lé parèj che ij dëssendent ëd Giusèp, visadì ëd Manasse e Efraim a l'han arseivù sò teritòri.
Teritòri assegnà a Efraim modifiché
5Ël teritòri assegnà a le famije d'Efraim a l'era costì: an partend da est sò finagi a andasìa da Atarot-Adar e Bet-Oron bassa. 6Costa frontiera a seurtìa vers ël mar a Micmeta, da la banda dël setentrion a virava vers levant fin-a Taanat-Silo, e an passand da orient, a rivava a Ianoach: 7Peui a calava da Ianoach a Ataròt e a Nara, a tocava Gérico, për seurte peui ant ël Giordan. 8Da Tapuach, ël finage andasìa vers ponent fin-a al torent ëd Cana, për finì al mar. Costa a l'é l'ardità dla tribù dj'Efraimita, conform soe famije, 9con la gionta dle sità (tute sità con sò vilagi), butà da banda për j'Efraimita an mes a l'ardità dla gent ëd Manasse.
10Ore, tutun, j’Efraimita a l'han pa scassà ij Canané ch'a stasìo an Gheser[2]; e ij Canané a stan ancora an mes d'Efraim fin-a al di d'ancheuj, combin ch'a sio sogetà a ‘d prestassion forsà.
Nòte modifiché
- ↑ Ant ël test ebràich Lus a vorìa esse 'l leu ëd testa dël finage che a andasìa da Betel a Lus. An d'àutri versèt Betel e Lus a smijo esse ìl midem pòst, antramentre che ambelessì a son diferent. Da notè che la NIV a vòlta "da Betel (visadì, Lus)" ambelessì, an seghitand la letura djë LXX, εiς Βαιθηλ Λουζα (eis Baithēl Louza, "da Betel a Lus).
- ↑ Cfr. Giùdess 1:29.