La Bibia piemontèisa/Testament Vej/Coelet/Coelet 11

←Coelet 10

La Bibia piemontèisa Coelet

Coelet 12→

La Bìbia piemontèisa - Qoèlet 11

Qoèlet

11

A venta travajé malgré l’ancertëssa dl’avnì

¹Fà comersi ëd toe produssion, càmpje da l’àutra part dël mar, e con ël temp at artorneran dij profit^[1], ²Ma divid ij tò 'nvestiment an tra set o eut pòst divers, përchè ti 't sas pa che dësgrassie a podrio capité an sla tèra.

³Se le nìvole a son pien-e d’eva, a la sverso an sla tèra; se na pianta a tomba a meridion o a tramontan-a, ambelelà andova ch’a casca, là a resta.

⁴Col ch’a-j dà da ment al vent a sëmnarà mai e col ch’a varda le nìvole a mëssonrà pa.

⁵Pròpi coma ch’as peul pa comprende ‘l senté dël vent o ‘l mistèri dla vita ch’as forma ant na fomna an condission, parèj ti ‘t peude nen comprende lòn ch’a fà Nosgnor, përchè a l’é chiel ch’a fà tut.

⁶A la matin ësmen-a toa smens, e a la sèira daje pa d’arlass a toe man, përchè it sas nen d’ andov a vniran ij tò profit, se da un travaj e da l’àutr o da tùit e dòi.

Valèisse dla vita durant la gioventura

⁷Coma ch’a l’é dossa la lus! Coma ch’a l’é bel da vëdd-se ‘l sol d’un neuv di ch’a monta!

⁸Se n’òm a viv për tanti agn, ch’as jë gòda tùit, e ch’a pensa ‘dcò ai di sombr, ch’a saran ëdcò vàire: tut lòn ch’a-j riva a l’é vanità.

⁹Alégher, giovo, an toa gioventura, e ch’as argiojissa tò cheur ant ij di ‘d toa gioventù. Séguita pura le stra ‘d tò cheur e j’anvìe dij tò euj. Contut a venta ch'it sàpie che Nosgnor at ciamrà an giudissi për tut sòn. ¹⁰Tapara via la malinconìa da tò cheur, slontan-a da tò còrp ël dolor, ma arcòrd-te che gioventura e caviera nèira a son un buf ëd fum.

Nòte

1. O ”Campa tò pan an sj'eve, përchè con ël temp it lo troveras torna”.