La Bibia piemontèisa/Testament Vej/Coelet/Coelet 10

←Coelet 9

La Bibia piemontèisa Coelet

Coelet 11→

La Bìbia piemontèisa - Qoèlet 10

Qoèlet

10

La folarìa e la saviëssa

¹Parèj coma na mosca mòrta a peul vasté 'l balsam dël përfumé: un pòch ëd matarìa a vasta^[1] la saviëssa e l'onor.

²Ël pensé dël savant a lo porta an sla strà giusta, ma coj ch'a l'han pa 'd sust a-j portan an sla strà sbalià^[2].

³As peul arconòsse na përson-a sensa sust fin-a da la manera ch’a marcia an sla stra. A l’é coma s’a disèissa a tuti: “Mi i son un fòl”.

⁴Se la flin-a d'un potent as anvisca contra 'd ti, lassa pa tò pòst, sta calm, përché la calma a pasìa 'dcò j'ofèise pì greve.

⁵A-i é n’àutr mal che mi i l'hai beicà sota 'l sol: ëd rè e ‘d governator a peudo fé n’eror pitòst grev: ⁶cand ch’a buto dij fòj ant ij pòst pì àut d’autorità e coj ch’a-i san fé, ëd gent dal valor provà, an posission basse. ⁷I l'hai vëddù dë s-ciav ch’a van a caval e 'd prinsi marcé a pé coma 'd servent.

⁸Col ch'a scava na tampa a podrìa tombeje andrinta^[3], e col ch'a dësbela na muraja a podrìa esse mordù da na serp. ⁹Col ch'a s-ciapa le pere a podrìa fesse dël mal e col ch'a ressia 'l bòsch a-i è privo ch’as taja.

¹⁰Se 'l fer a taja nen e as mòla pa 'l fil, a venta travajé 'd pì: a-i la fà col ch'a deuvra bin la saviëssa.

¹¹Se 'l serpent a lo mòrd anans d'esse anciarmà, a còsa serv a fé l'ancantador?

¹²Le paròle dla bòca dël savi a-j vagno d’aprovassion^[4], ma ij làver dla përson-a sensa sust a la mando an malora^[5]. ¹³Le përson-e sensa sust a fondo ij sò pensé an sù ‘d fàusse premësse: a l’é parèj che soe conclusion a saran ëd matarìe grame.

¹⁴Coj ch'a l'han nen ëd sust a diso tròpe paròle: Sà-lo pa l'òm lòn ch'a-j capitrà? Col ch'a l'é ch'a-j dirà lòn ch'a-i sarà dòp ëd chiel?

¹⁵Ij fòj a fan mach un pò ‘d travaj e già a son ëstrach: a peudo gnanca pì trové la strà ch’a-j pòrta a ca^[6].

¹⁶Maleur a ti, pais, ch'it l'has un fiolin sensa esperiensa për rè, e andova ch’ ij prinsi a son là ch’a fan festa fin-a da la matin! ¹⁷Ti, bonorà, pais, ch'it l'has për rè n'òm lìber e ij prinsi a fan disné cand ch'a l'é l'ora përchè a l’han fam e nen da sventronà.

¹⁸Për la gargarìa ël sofit a droca e për la fagnanerìa dle man a pieuv antëcà.

¹⁹Për esse content as fan ëd disné e 'l vin a dà gòj a la vita, ma a son ij sòld ch’a conto da pì.

²⁰Sparla pa dël rè gnanca con ël pensé e maledis nen ël potent gnanca da stërmà an toa stansia da let, përchè n'osel dël cél a podrìa portèje la vos e dije lòn ch’it l’has dit!

Nòte

1. O “A peul conté da pì che”.
2. Let. “...a va a la drita e col dël sensa sust a va a snistra”
3. Cfr. Salm 7:15; Proverbi 26:27.
4. O “binvolensa”.
5. Le paròle a arvelo ‘l cheur ëd l’òm, e lòn ch’as dis a peul avèj ëd conseguense greve (Maté 12:24-37).
6. O “a la sità”.