Rino Serra/Le fior dël mal/054
LIV. Sensa rimedi modifiché
Pudoma noi sofoché 'l vej, longh rimòrs
Ch'a viv, s'agita 'n s'antërtoj
E as nutriss ëd nojàutri coma 'l verm dij mòrt,
E istess a la bòja dle roj?
Pudoma noi sofoché l'implacabil rimòrs?
An che filtro, an che vin, o an che tisan-a
Noi i nijeroma 's vej nemis,
Distrutor e galup coma la cortisan-a,
Passient coma la formija 's dis?
An che filtro? -An che vin? -O an che tisan-a?
Dislo, bela masca, oh! Dilo se it lo sas ti,
A sto spirit ch'a l'é d'angossa pien
E coma 'l moribond crasà dai ferì,
Che 'l sòcol dël caval pistand a ven,
Dislo, bela masca, oh! Dilo se 't lo sas ti,
A st'agonissant che 'l luv a nufia già
Che già 'l cornajass lo spia,
Ormai a peul disperé, sto sfinì soldà
Che na cros an soa tomba a-i sìa;
Ës pòr agonissant che 'l luv a nufia già!
As peul s-ciairisse dël cel la vòlta nèira?
As peul donca squarsé 'l tënëbror
Pì spess ëd l'ampèis, sensa matin e sensa sèira,
Sensa astr, sensa 'l funerari ciairor?
As peul s-ciairisse dël cel la vòlta nèira?
La speransa ch'a lus ai véder ëd l'obergi
L'é dëstissa për sempe, l'é mòrta
Sensa lun-a e sensa ragg, trové l'obergi
Dij martir ëd na stra dëstòrta!
Ël diav l'ha dëstissà tut ai véder dl'obergi!
Adorabil strìa, it veule bin ti ai danà?
Dime, it conòsse l'imperdonabil?
Conòs-to dël rimòrs le flece 'nvelenà
Dova nòst cheur l'é bërsaj imòbil?
Adorabil strìa, it veule bin ti ai danà?
L'ireparabil a rosìa con dent maledet
Nòstra ànima, pietos monument,
Coma tèrmita sovent a fà l'atach diret
Sempe a la base dl'apartament!
L'ireparabil a rosìa con dent maledet!
L'hai vist ëd vòlte, al fond d'un teatro banal
Afoà da l'orchestra sonora,
Una faja 'nvisché 'nt un cel infernal
Una miracolosa aurora;
L'hai vist ëd vòlte, al fond d'un teatro banal
Un esse fàit con ëd lus, òr, ëdcò 'd vel,
Ël grand Sàtan ant un nen ateré;
Ma 'l mè cheur, che mai a visita 'l bel,
L'é 'n teatro dova 's peul ëspeté
Sempe për gnente, l'esse con j'ale 'd vel!