La Bibia piemontèisa/Testament Vej/Samuel/1 Samuel 31

←1 Samuel 30

La Bibia piemontèisa Prim e scond lìber ëd Samuel

2 Samuel 1→

La Bìbia piemontèisa - 1 Samuel 31

1 Samuel

31

La mòrt ëd Saul

¹Ant ël mentre, ij Filisté a l’avìo angagià bataja contra d'Israel, ma j’Israelita a l’ero scapà dë 'dnans a lor e tanti ‘d lor a l’ero tombà mòrt an sij mont ëd Ghilboa. ²Ij Filisté a l’han daje dapress a Saul e ai sò fieuj, e a l’han massà Giònata, Abinadab e Malchi-Sua, fieuj ëd Saul. ³Anlora ‘l pèis dël combatiment a l’é grevà dzora 'd Saul. J’arcé a l’han trovalo e a l’han ferilo grev.

⁴Anlora Saul a l’ha dije a sò scudié: “Dësfeudra toa spa e mass-me anans ch’a rivo coj ansirconcis a felo lor e peuj a më sbefio”. Ma sò scudié a vorìa pa felo për ël gran rispet ch’a l’avìa për Saul. Parèj che Saul a l’ha piantà a tèra soa spa e a l’é campassie ansima. ⁵Cand ch’a l’ha vëddù che Saul a l’era mòrt, ëdcò lë scudié a l’é campasse dzora ‘d soa spa e a l’é massasse con chiel. ⁶Parèj a son mòrt, an col di-là Saul, ij sò tre fieuj, sò scudié e tùit ij sò òm.

⁷Cand che j’Israelita ch’a l’ero da l’àutra banda dla valada e coj ch’a l’ero da l’àutra rivera dël Giordan a l’han vëddù la dërota dl’armèja d’Israel e ch’a l’ero mòrt Saul e ij sò fieuj, a l’han chità soe sità e a son ëscapà. Ij Filisté a l’han ocupaje e a-i son ëstabilisse.

⁸Ël di apress, ij Filisté a son andàit për dëspojé ij mòrt e a l’han trovà Saul e ij sò tre fieuj mòrt an sij mont ëd Ghilboa. ⁹A l’han tajaje la testa e dëspojaje ‘d soe arme, e a l’han fàit porté tut ant ël pais dij Filisté, an virand daspërtut d’antorn për nunsié la bon-a neuva dla vitòria ai sò ìdoj^[1] e a sò pòpol. ¹⁰A l’han deposità j’arme ‘d Saul ant ël templ d’Astarte e, për lòn ch’a riguarda ij sò còrp, a l’han penduje ai rampar ëd Bet-Sean.

¹¹Cand che la gent ëd Iabes dël Ghilead a son vnùit a savèj lòn che ij Filisté a l’avìo faje a Saul, ¹²tùit ij sò òm vajant a son surtì dla sità e, apress d’avèj marcià për tuta la neuit, a l’han portà via da le muraje ‘l còrp ëd Saul e dij sò fieuj, a l’han portaje a Iabes e peuj a l’han cremaje. ¹³Apress a l’han pijàit ij sò òss e a l’han sotraje sota ‘l tamarisch ëd Iabes. Peui a l’han digiunà për na sman-a.

Nòta

1. La divinità semìtica Astarte a l'era gropà a j'ideje d'amor e 'd guèra ant ël Davzin Orient. Cfr. 7:3.