La Bibia piemontèisa/Testament Vej/Salm/Salm 38

←Salm 37

La Bibia piemontèisa Ij Salm

Salm 39→

Ij Salm

La Bìbia piemontèisa - Salm 038

38. Nosgnor, i l’hai fate perde la passiensa

L’autor a ciama a Nosgnor ëd liberelo dai sò nemis. A confessa ij sò pëccà e a arconòss che ‘l motiv përchè chiel a l’é an crisi a l’é l’arzultà dl’assion dissiplinària ‘d Nosgnor. Pura, a ciama a Nosgnor ëd nen chitelo.

¹Un Salm ëd David anté ch’a ciama a Nosgnor ëd visesse ‘d chiel. Nosgnor, i l’hai fate perde la passiensa, vera, ma castigh-me pa con tanta fùria. ²Toe flece a l’han frapame e a son ficasse an mia carn. Ij tò colp am craso. ³Për motiv ëd toa ira, mè còrp antregh a l’é malavi; i l’hai përdù la salute^[1] për motiv dij mè pëccà. ⁴Mie colpe am rivo fin-a dzora dla testa, a son un pèis ch’a l’é tròp grand da porté. ⁵Le ferije ch’i pòrto an sël mè còrp a van an cancren-a e a spusso, e lolì për motiv dij pëccà ch’i l’hai fàit da stùpid. ⁶I son prostrà e abatù, i marcio tut ël dì trist e con la testa bassa. ⁷Na frev afoà am dvora le buele, e an tut mè còrp a l’é restaje pì nen ëd san. ⁸I son ësfinì e del tut disfàit. Ij mè lament a seurto da ‘n cheur angossà.

⁹Ti’t sas, Nosgnor, lòn ch’i n’hai anvìa përchè ti të scote bin minca mè sangiùt. ¹⁰Mè cheur a martèla, mie fòrse am bandon-o; ël lum dij mè euj as dëstissa. ¹¹J’amis e jë vzin as në stan bin lontan e a l’han pau ‘d mia maladìa; fin-a mia famija as në sta lontan da mi. ¹²E coma se tut sossì a bastèissa pa, ij mè nemis am buto dë 'dnans ëd tràpole për masseme. Coj ch’am veulo mal a fan dij progèt për ruvineme. A studio tut ël dì dij tradiment. ¹³Mi, contut, a soe mnasse ‘d lor i faso ‘l ciòrgn, i veuj steje nen a sente; coma s’i fussa mut i doverto gnanca la boca. ¹⁴I faso coma s’i sentèissa pa, coma s’i l’avèissa nen da replicheje.

¹⁵Nosgnor! Mia speransa a resta an ti; lass-me pa sensa rëspòsta, Signor, mè Dé. ¹⁶I l’hai pregà: “Lassje pa arlegress-ne dij mè sagrin, o ch’a canto vitòria ‘d mia dësfàita”, ¹⁷përchè i son lì-lì për tombé e i peuss pa pì soporté mè dolor. ¹⁸I confesso mia colpa, mè pëccà am tormenta. ¹⁹I l’hai ancora tanti nemis violent, a son ëd legion coj ch’am m’han an òdio sensa rason. ²⁰Am arpago con ël mal, ma mi i l’hai faje mach ëd bin; am acuso ch’i l’hai sercà ‘d fé 'l bin. ²¹Nosgnor! Chitme pa! Mè Dé! Slontante pa da mi! ²²Ven an pressa a giuteme, mè Signor, mè Salvator!

Nòte

1. O “ij mè òss a treuvo pa d’arpòs”.