La Bibia piemontèisa/Testament Vej/Salm/Salm 17

←Salm 16

La Bibia piemontèisa Ij Salm

Salm 18→

Ij Salm

17. Nosgnor!! Considera mia giusta càusa

La Bìbia piemontèisa - Salm 017

Ël Salmista a ciama Nosgnor ch'a 'nterven-a an sò favor përchè soa vita a l'é mnassà da 'd nemis arzigos. A fà apel a la giustissia divin-a, përchè a l'é cert ëd soa nossensa. Pròpi përchè a l'é nossent, chiel a së speta d'ancontré Nosgnor e arsèive na paròla 'd consolassion.

¹Orassion ëd David. Nosgnor!! Considera mia giusta càusa^[1]. Fà atension a mè crij d'agiut. Scota la preghiera ch'it ësmon-o s-cet. ²Fà na giusta decision an mè favor! Delibera lòn ch'a l'é giust! ³Ti 't l'has guardà da bin le motivassion ëd mè cheur. It l'has esaminame 'nt ël mentre ch'i durmìa. It l'has fane na valutassion e 't l'has trovà ch'i l'avìa gnun pecà. I l'hai fërma la determinassion ëd dì gnente ch'a peussa disse ‘n pecà. ⁴I l'hai nen seguità lòn che 'l mond a fà. Giusta coma ti 't l'has comandà, i son nen andaje dapress a le pianà 'd coj ch'a son violent. ⁵I vado dapress diligentement mach a la via ch'it l'has mostrame. I në ciapo gnun-a deviassion. ⁶Nosgnor! I t'invoco përchè i sai che ti 't ëm ëscoteras. Scotme! Scota lòn ch'i diso! ⁷Fedel coma ch’it ses, fà vëdde a tuti le maravije ch'it fas, ti ch'it libere coj ch'a vardo a ti për trové 'd protession dai sò nemis. ⁸Guern-me tanme ti 't guernèisse ël luminèt ëd tò euj! Fame sté stërmà a l'ombra 'd toe ale! ⁹Guern-me da la gent grama ch'am ataca. Ij mè nemis am ëstan d'antorn mach për masseme. ¹⁰A l'han ëd cheur ëd pera, a parlo con arogansa. ¹¹Am ataco, adèss lor a më stan dantorn. A l'han l'intension ëd campeme a tèra. ¹²Mè nemis a l'é tanme 'n leon ch'a veul fé a tòch soa preda, tanme 'n leon giovo ch'as quacia an dij leugh stërmà.¹³Seurt fòra, Nosgnor! Pija posission ëdnans a chiel! Butlo an ginojon! Deuvra Toa spa për libereme da sta gent grama! ¹⁴Deuvra Toa potensa për libereme da sti sassin, dai sassin dë sto mond! Soa prosperità a-j rend arogant. Ti 't l'has daje abondansa 'd beni, tut lòn ch'a vorìo. A l'han tante masnà e a lor a-j lasseran soe richësse. ¹⁶Për lòn ch'am rësguarda, përchè i son nossent, i vëdrai Tò visagi. Cand che mi 'm dësvijerai, i godrai 'd Toa arvelassion.

Nòte

1. O "lòn ch'a l'é giust".