La Bibia piemontèisa/Testament Vej/Salm/Salm 137

←Salm 136

La Bibia piemontèisa Ij Salm

Salm 138→

Salm

La Bìbia piemontèisa - Salm 137

137. Arlongh ëd le rivere ‘d Babilònia

J’esilià ‘d Babilònia a fan ëd plente për soa condission, a fan ëd vot ëd resté fedej a Gerusalem e a ciamo a Nosgnor ch’as pija soa arvangia contra dij sò nemis.

¹Arlongh ëd le rivere ‘d Babilònia i j’ero setà e i pioravo për la nostalgìa ch’i j’avìo ëd Gerusalem^[1]. ²I l’avìo butà da banda nòstre arpe e tacaje a ij branch dij sàles ëd la sità. ³Coj ch’a l’avìo deportane an ciamavo soens ëd canté për lor, an ciamavo ‘d canté ‘d canson alégre ‘d festa, pròpi lor ch’a l’avìo gavane tute le rason për felo. An disìo: “Canté për nojàutri un-a dle canson ëd Gerusalem!”. ⁴Ma coma podrìo-ne mai canté le canson ëd Nosgnor ant na tera forëstera?

⁵Se mai it dësmentièissa, Gerusalem, che mia man drita as dësmentia ‘d coma soné l’arpa. ⁶Che mia lenga as taca a la vòlta dla boca, s’i manchèissa d’arciamete a la ment, s’i faso nen ëd Gerusalem la sorgiss ëd mia gòj la pì granda.

⁷Nosgnor! Arciama a la ment lòn ch’a l’avìo fàit j’Edomita cand che j’armeje ‘d Babilònia a son pijasse Gerusalem. “Spianela tuta, dësblela!” a crijavo. ⁸Babilònia! It saras ti a d’esse dësblà! A l'avrà 'd boneur col ch’a farà a ti lòn che ti ‘t l’has fàit a nojàutri^[2]! ⁹A l'avrà 'd boneur col ch’a ciaprà toe masnà e a-j farà meuire sbatùe contra ‘d na ròca coma ti ‘t l’has fàit con le nòstre.

Nòte

1. O “Sion”.
2. Cfr. Arvelassion 18:6.