La Bibia piemontèisa/Testament Vej/Salm/Salm 127
Salm
modifiché127. S'a l'é nen Nosgnor ch'a fàbrica la ca
modifiché- An cost salm sapiensial, ël Salmista a mostra che as peul pa trovesse sicurëssa 'nt jë sfòrs ch'i foma nojàutri, përchè a l'é mach Nosgnor ch'an dà stabilità e sicurëssa.
1Càntich dij pelerinagi ch'as arfà a Salomon. S'a l'é nen Nosgnor ch'a fàbrica la ca, a serv pròpi a nen che ij fabricant as dago tant da fé. S'a l'é pa Nosgnor ch'a guerna la sità, a serv pròpi a nen che le guardie a vijo. 2A serv pròpi a nen ch'is levoma a la matin bonora e ch'i andoma tard a deurme për mangé 'd pan vagnà con pen-a: fin-a a cand ch'i deurmoma, a l'é Nosgnor ch'a lo dà a coj ch'a son dij sò amis.
3Ëd fieuj a son l'ardità che Nosgnor an dà; avèj ëd dissendent a l'é la mej arcompensa; ij fieuj ch'an son nassù cand ch'i j'ero giovo a son tanme le flece an man d'un guerié. 4Che 'd boneur ch'a l'han coj ch'a n'han ël feuder[1] pien. S'a dëscuto ant la piassa con j'aversari a l'avran pa da artiress-ne con onta.
Nòte
modifiché- ↑ O “farétra”, “stucc”.