La Bibia piemontèisa/Testament Vej/Salm/Salm 122
Ij Salm
modifiché122. Che ‘d gòj cand ch’a l’han dime: “Andoma a la ca ‘d Nosgnor!”
modifiché- Ël Salmista a dà espression a sò amor për Gerusalem e a promet ëd preghé për soa sicurëssa.
1Càntich ëd pelerinagi. As arfà a David. Che ‘d gòj cand ch’a l’han dime: “Andoma a la ca ‘d Nosgnor!”. 2E ora vardé-sì ch’i soma rivà e ch’i l’oma traversà ij tò portaj, Gerusalem. 3Gerusalem a l’é na sità bin fabricà; soe fòrte muraje a peulo pa esse campà giù. 4Tute le tribù d’Israel - ël pòpol ëd Nosgnor - a-i fan sò pelerinagi. A-i rivo për ringrassié ‘l nòm ëd Nosgnor, coma ch’a stabiliss la lege d’Israel. 5A l’é là ch’a stan ij tribunaj dla giustissia, ij tribunaj dël palass ëd David.
6Preghé për la pas ëd Gerusalem. Ch’a-i vivo an sicurëssa coj ch’a-j veulo bin. 7Gerusalem! Ch’a-i sia la pas an tra toe muraje e bondosità ant ij tò palass. 8Për amor ëd mia famija e dij mè amis, i dirai: “Che ti 't l’àbie pas!”. 9Për la ca ‘d Nosgnor, nòst Dé, i-j foma ‘d vot ëd boneur[1].
Nòte
modifiché- ↑ O "I sërcherai tò bin". Con mie preghiere i ciamo a Nosgnor ëd benedì Gerusalem con abondansa.