La Bibia piemontèisa/Testament Vej/Salm/Salm 121
Ij Salm
modifiché121. I àusso j’euj a le montagne
modifiché- Sto salm a fortiss che Nosgnor a l’ha pijasse l’angagg ëd guerné sò pòpol e ch’i l’oma da avèj gnun-a tëmma che un di chiel a chitrà ‘d félo për na rason qualsëssìa..
1Càntich për ël pelerinagi. I àusso j’euj a le montagne: da andova am ëvnirà l’agiùt? 2L’agiùt am ëvnirà da Nosgnor, col ch’a l’ha fàit ël cel e la tèra. 3Chiel a lasserà pa ch’ij tò pé as antrapo; col ch’at guerna as ardurmirà pa. 4Vera, a capitrà mai che col ch’a guerna Israel as andurmissa. 5Nosgnor at guerna, Nosgnor a l’é tanme l’ombra ch’at ëstà sèmper dacant. 6A l’é për lòn ch’at farà gnun mal ël sol dël di, nì la lun-a ‘d neuit. 7Nosgnor at guernerà dal mal ch’a podrìa ciapete damentre ch’it vas e ch’it ven-e, ora e për sèmper[1].
Nòte
modifiché- ↑ O “tùit ij sécoj”.