La Bibia piemontèisa/Testament Vej/Proverbi/Proverbi 5

←Proverbi 4

La Bibia piemontèisa Provèrbi

Proverbi 6→

Provèrbi

La Bìbia piemontèisa - Proverbi 05

5

La fomna sedutriss

¹Fieul mè car! Fà ‘tension a mia sapiensa, dà dl’orija ai mè savi consèj, ²antlora ti ‘t podras mostré^[1] ‘d discression e da toa boca^[2] a seurtiran còse sensà.

³Ij làver ëd la sedutriss^[3] a san d’amel^[4], soe paròle a viro bin tanme ‘d roe bin olià, ⁴ma a la fin as arvelo mère com ël tòssi^[5] e pì filà che na spa a taj dobi. ⁵Ij sò pé a coro lest anvers la mòrt, ij sò pass a men-o drit a la tomba. ⁶Ël senté ch’a pòrta a la vita, chila a va gnanca a sërchelo. A va anans com a ven a ven^[6]: as n’anteressa pa.

⁷Për conseguensa, fieuj, steme a sente; pense pa ch’ij mè consèj a sio ‘d tròp e ch’as peuda sganfeje. ⁸Sté bin lontan da na fomna parèj; avzineve gnanca a la pòrta ‘d soa ca. ⁹Andé con un-a parèj at farìa mach perde tò onor^[7] e it përdries, për motiv ëd gent sensa pietà, tut lòn ch’it l’has vagnà ant la vita^[8]. ¹⁰Dij strangé a dvorerìo ij tò beni e cheidun d’àutr a ‘ndrìa a gòde ‘l frut ëd tò travaj. ¹¹E a la fin ëd toa vita, mentre che tò còrp a l’é consumà da la maladìa, it ëstarìe mach lì regretos a pioré. ¹²It dirìe: “Antlora i l’avìa an ghignon ij rimprocc^[9]: s’i l’avèissa bin dàit da ment a j’avertiment!. ¹³Përchè i l’hai pa scotà la vos dij mè magìster nì i l’hai fàit cas a lòn ch’am mostravo? ¹⁴I son rivà an sla broa dla pì granda rovin-a e adess, dë 'dnans a tuta la comunità, i l’hai da portene l’onta!”.

La benedission ëd na bon-a fomna

¹⁵Bèiv l’eva dla toa sisterna, l’eva ch’a sgorga da tò poss. ¹⁶Avrìa-la da sgheiresse l’eva ‘d toa sorgiss? Avrìa-la da perd-se fòra për le stra l’eva dij tò torent? ¹⁷Che cola eva a sia mach për ti: a l’é pa da spartì con dij foresté. ¹⁸Che toa sorgiss a sia benedìa! Che ti ‘t peuda arlegrete dla fomna ch’it l’has marià quand ch’it j’ere giovo. ¹⁹Ch’a sìa për ti na serviòta amabil, na sërbiata grassiosa; che soe pupe at sodisfo sèmper; che sèmper ti ‘t sia cheuit d’amor për chila. ²⁰Perchè dovries-to fete anciarmé da na fomna adultera? Përchè l’avrìes-to da casché ant ij brass ëd na strangera? ²¹J’euj ëd Nosgnor a bèico sèmper lòn ch’i foma; Nosgnor a conòss tùit ij nòst pass. ²²Ij përvers a saran antrapà da soe colpe ‘d lor midéme e a tomberan an la tràpola dij sò pëccà. ²³A meuireran përchè a san pa dominesse; soa stupidità ‘d lor a-j farà vnì ciapà tanme ‘d pèss.

Nòte

1. O “goerné”.
2. O “ij tò làver”.
3. O “dla fomna anciarmanta”.
4. O “l’amel a cola a stisse dai làver ëd la sedutriss”.
5. O “pì amèr che l’absent”.
6. O “a l’asar”.
7. O “a sarìa coma sgheiré le  mej fòrse ch’it l’has”, “at farìa andé a lë sgàir”.
8. La “gent sensa pietà” as arferiss probàbil a la vendeta dij parent, o dël marì” ‘d cola fomna.
9. O “la dissiplina”.