La Bibia piemontèisa/Testament Vej/Proverbi/Proverbi 30

←Proverbi 29

La Bibia piemontèisa Provèrbi

Proverbi 31→

La Bìbia piemontèisa - Proverbi 30

Provèrbi

30

Paròle d’Agur

¹Paròle d’Agur, fieul ëd Jaché; ël mëssagi profetich che st’òm-sì a l’avìa dit a Itiel e a Ucal.

²“Sicura che mi i son ël pì ignorant ëd j'òm e i l'hai pa la saviëssa che tanti as në fan blaga. ³Mi i l'hai pa amprendù la saviëssa a scòla e i l’hai pa la conossensa ch’a l’ha ‘l Sant. ⁴Col che a l'é ch'a l'àbia montà al cel e a në sia peui calà? Chi ch'a l'é andàit a cheuje ël vent an soa man? Chi che a l'ha sarà j'eve an sò mantel? Col che a l'é ch'a l'ha fongà tùit ij finagi dla tèra? Coma ch’a së s-ciama? Col ch'a l'é ël nòm ëd sò fieul, ti 't lo sas? ⁵Minca paròla 'd Nosgnor a l'é pura e a l’é sempe mostrasse vera^[1]; chiel a l'é tanme në scu për coj ch'as buto sota soa guerna. ⁶Giontje pa nen a soe paròle, përchè a vada pa a arprocete e ti 't sie nen trovà busiard. ⁷Nosgnor! Doe ròbe it ciamo, arfúdmje pa anans che mi i meuira: ⁸Ten leugn da mi la faussità e la busiardarìa, dame nen nì miseria nì richëssa, ma fame avèj ël giust ch'i l'hai damanca, ⁹përchè, na vòta pasiame, mi 't arnega pa e i disa: ‘Chi é-lo Nosgnor?” Opura, butà ant lë bzògn, ch'im buta nen a robé e i dzonoro 'l nòm ëd Dé”.

¹⁰Dì nen ëd mal d’un servitor ëdnans ëd sò padron, përchè chiel at maledissa pa e ti 't n'arsèiva nen un castigh.

¹¹A-i é ëd gent che a malediss sò pare e ch'a benediss pa soa mare. ¹²A-i é ëd gent ch’a chërd d'esse càndia, ma che a l'é pa arzentasse 'd soa drugia. ¹³A-i é ëd gent con j'euj tant superb e con le parpèile tant boriose! ¹⁴A-i é ëd gent ch’a l’ha ‘d dent tanme dë spa e ij sò dent maslé tanme ‘d cotej, për balafré ij pòver fòra da la tèra, e coj ch’a l’han da manca dël necessari d'an tra j'òm.

¹⁵La sansùa a l'ha doe fije ch’a diso sèmper: “Dame, dame!”. Tre ròbe a son mai sodisfàite; nen mach, ma quat a diso: “Mai pro”: ¹⁶la mòrt^[2], la fàuda turgia, la tèra ch'a n'ha mai basta d'eva e 'l feu che a dis mai: “Pro!”.

¹⁷L'euj che a varda an ësbefianda sò pare e a dëspressia 'd deje ubidiensa a soa mare, che a sia gavà dai creus ëd la val e mangià dai cit ëd l'òja.

¹⁸Tre ròbe a van dëdlà ëd mia comprension, nen mach, ma a son quatr che mi i capisso pa: ¹⁹ël vieul ëd l'òja ant ij cej, la stra dël serpent ëdzora dij ròch, la stra 'd na nav ant ël mar àut, ël senté ëd n'òm con na fomna giovo^[3].

²⁰Na fomna adùltera as compòrta parèj: chila a mangia, peui as polida la boca e a dis: “I l'hai pa fàit ëd mal!”.

²¹A-i son tre ròbe ch'a fan tramblé la tèra: nen mach, ma a son quat che mi i peudo pa soporté: ²²në s-ciav che a ven a esse rè, un fòl cand che chiel as ampiniss ël gosé ‘d mangé, ²³na fija ghignonanta ch’as maria, na sërventa che as fasa padron-a.

²⁴A-i é quat cite creature, an sla tèra, che pura a son pì savante dij cacam: ²⁵le furmìe, rassa sensa fòrsa, ma che d'istà as procuro soa provianda; ²⁶ij daman, rassa sensa difèise, ma che a drisso soa ca an tra ij ròch; ²⁷j'aliòstre, che a l'han pa un rè, ma che a san marcé tute antropà; ²⁸la laserta, che as peul ciapesse con le man, ma che a l'é bon-a a intré fin-a ant ij palass dël re.

²⁹Tre creature a l'han un bel portament, ansi, quatr ch’a marcio con maestosità; ³⁰ël leon, la pì fòrta dle bestie, che a scapa an facia a gnun; ³⁰ël gal, arbiciolù, e 'l boch: un rè dë 'dnans a soa gent^[4].

³²Se ti 't ses ëstàit tant fòl da cissete o s’it pensave mal, but-te la man an sla boca! ³³Përchè a l'é an cicojand ël làit che as fà ël butir; schissand ël nas che as fà seurte 'l sangh e an cissand la flin-a a ven-o fòra mach ëd ruse.

Nòte

1. Ël test a deuvra ambelessi na comparission sotantèisa (na manera 'd parlé ch'as ciama ''hypocatástasis(smijànsa, rapresentassion amplìcita)''. Ël test a comparission-a la përfession ëd minca na paròla ch'a ven da Nosgnor Dé con ëd metal pressios ch'a l'é stàit rafinà e purificà (cfr. Salm 12:6). A veul dì che dla Paròla 'd Nosgnor as peul fidesse, ch'a l'ha gnun difèt o eror, ch'a-i è nen ch'a sia fàuss o ch'a dëstorna(da nen confonde con ἀποκατάστασις , apokatástasis:restaurassion e redension universal). La sconda part ëd cost vers a dëspiega la portansa 'd cost pont: i-i podoma sté sicur, i podoma fidesse 'd Nosgnor.
2. O “la tomba”, o “Sheòl”.
3. O “l’amor ëd n’òm e na fomna”.
4. O “con soa armeja”.