La Bibia piemontèisa/Testament Vej/Salm/Salm 12
Ij Salm
modifiché12. Nosgnor: giùtme perchè ‘d brava gent as treuva pa pì
modifiché- Ël Salmista a sùplica Nosgnor d’anterven-e, përchè la società a l’é dominà da 'd gent aroganta e sensa religion ch’a crasa la pòvra gent e coj ch’a fan giust a son sèmper ëd men-o. Cand che Nosgnor a nùnsia soa 'ntension ëd guerné coj ch’a son crasà, ël Salmista a ‘rneuva soa fiùsa ant la promëssa ‘d Nosgnor.
1Për ël diretor dël còro: un Salm ed David da companiesse con n'ëstrument a eut còrde[1]. Nosgnor: giùtme perchè ‘d brava gent as treuva pa pì. Ij fedej a son dësparì da la facia dla tèra! 2Tut lòn ch’as diso l’ùn con l’àutr a son mach ëd tromparie, frut ëd làver busiard e ‘d cheur pront a ‘ngabiolé. 3Che ‘l Signor a sara la boca ch’a l’han, pien-a ‘d flaterìe e ch’a fasa sté ciuto cole lenghe ch’a spuvo arogansa. 4Lor a diso: “I soma brav a parlé, i savoma bin coma dësfend-ne. Chi é-lo mai ch’a podrìa fërmene?”. 5Ma ‘l Signor a rëspond: “I l’hai bin vëdduie le violense ch’i l’eve fàit a coj ch’a peudo nen dësfend-se. Adess mi ’m leverai a salveje, përchè a l’han ciamame agiùt”. 6I podoma avèj pien-a fiusa dle Paròle 'd Nosgnor. A son sensa difèt tanme d'argent purificà ant un forn da mon, anté ch'a ven rafinà dël tut.7A l’é për lòn ch’i savoma che ti, Nosgnor, it guerneras coj ch’a son crasà, e i-j presërvras për sèmper da costa generassion ëd busiard. 8J’angiust as në van an gir daspërtut, cand che 'd lòn ch'a l'é mal as në fà la promossion.
Nòte
modifiché- ↑ O “Conform a le Seminit”