La Bibia piemontèisa/Testament Vej/Proverbi/Proverbi 25

←Proverbi 24

La Bibia piemontèisa Proverbi

Proverbi 26→

La Bìbia piemontèisa - Proverbi 25

Provèrbi

25

D’àutri proverbi cujì cand ch’a l’era rè Esechia

¹Costi-sì a son d’àutri proverbi ‘d Salomon, butà ansema dai consijé d’Esechia, rè ‘d Giuda.

²A l'é glòria 'd Nosgnor dë stërmé ‘d ròbe e la glòria d’un rè d sërcheje.

³Vàire ch’a l’é àut ël cel, tant as peul nen sondé lòn ch’a passa për la ment^[1] dij rè.

⁴S'it gave le scòrie da l'argent, ël bisotié a në farà un bel vas^[2]; ⁵s'it gave l'òm përvers da la cort dël rè, sò tròno a restrà frem ant la giustissia.

⁶Date pa d'arie dë ‘dnans al rè e but-te nen dova ch’a stan j’eminense, ⁷përchè a l'é mej sentisse dì ëd monté pì anans pitòst che esse umilià 'dnans a 'n prinsi^[3].

⁸Cand ch’it l’has vëddù cheicòsa, àbie gnun-a pressa d’andé a testimoniela dnans ai giùdess dësnò lòn ch'it faras cand che tò avzin at dirà 'l contrari? ⁹Dëscut pura toa càusa con tò avzin, ma disje pa 'l segret ëd j'àutri, ¹⁰dësnò col ch'a scota at trovrà da dì e pì gnun andrà a chërde a lòn ch'it dise.

¹¹Na paròla pronunsià a temp a l'é parèj d'un frut d'òr an s'un cabarèt d'argent.

¹²Un savi ch’a fà na giusta armarca a n'òm ch’a scota a l'é parèj ëd n'anel d'òr e 'd na pera pressiosa.

¹³Fresch parèj dla fiòca al temp ëd l'amson a l'é n'ambassador fedel për chi ch’a lo manda; a arlama 'l cheur ëd sò padron.

¹⁴Col ch’a promet ma ch’a fà mai lòn ch’a l’ha promëttù a l'é parèj dle nìvole e dël vent sensa pieuva.

¹⁵Mach con la passiensa as peul convince ‘n prinsi, e le paròle dosse a s-ciapo fin-a j'òss.

¹⁶S’at pias l’amel e it lo trove, angosont-ne pa, dësnò at vnira la nàusia e it lo gumitras.

¹⁷Va pa tùit ij moment a ca 'd tò avzin s'it veule nen ch'a së stofia 'd ti e at pija an ghignon.

¹⁸Testimonié ‘l fàuss contra tò pròssim a l’é parèj ëd patlelo con un baston, ferilo con la spa o tireje na flecia aùssa.

¹⁹Fidesse ‘d cheidun nen pro degn ëd fiusa a l’é tanme mastié con ëd dent mars o marcé con un pé stropià.

²⁰Canté na canson alégra ‘dnans a n’òm sagrinà a l’é coma porteje via ‘l mantel cand ch’a l’é frèid o buteje d'asil dzora 'd na fërleca viva.

²¹Se tò nemis a l'ha fam, daje da mangé, s'a l'ha sèj, daje da bèive, ²²përchè parèj a l’é coma s’it ambaronèisse 'd brasa dzora 'd soa testa e Nosgnor at compenserà^[4].

²³Tanme ‘l vent dël nòrd a pòrta con chiel la pieuva, na lenga ch’a-j pias dë sparlassé as tira acòl mach ëd ràbia.

²⁴A l’é mej vive da sol ant un canton dël solé che vive ant na bela ca an companìa ‘d na fomna ch’a rusa an continuassion.

²⁵Arsèive na bon-a neuva da 'n pais lontan a l'é parèj d'eva frësca për na gola sùita.

²⁶N’òm giust ch’as piega ‘dnans a n’òm përvers a l'è parèj d'un bornel tërbol e 'd na sorgiss anvelenà.

²⁷Pa bel mangé tròp amel, nì lassesse anciarmé da le paròle dij flateur.

²⁸L'òm ch’a sà pa dominé la flin-a a l'é parèj ëd na sità drocà e sensa 'l vir ëd soe muraje.

Nòte

1. O “cheur”.
2. L'ebràich כֶּלִי (cheli) a veul dì "utiss; asi”.
3. 25:6-7 Luca 14:8-10
4. 25:21-22 cfr. Roman 12:20.