La Bibia piemontèisa/Testament Vej/Giudes/Giudes 20

←Giudes 19

La Bibia piemontèisa Giudes

Giudes 21→

La Bìbia piemontèisa - Giudes 20

Liber dij Giudes

20

Ciambreja dj’Israelita

¹Anlora tuti j’Israelita coma s’a fusso ‘n sol òm a l’han lassà soe ca e a son assemblasse a Mispa a la presensa ‘d Nosgnor. ²A la ciambreja ‘d tut ël pòpol ëd Dé a l’han pijàit pòst ij cap ëd tute le tribù d’Israel: quatzent òm a pé, bon a dé man a la spa. ³Ij Beniaminita a l’avìo sentù dì che j’Israelita a l’ero montà a Mispa. J’Israelita a l’han ciamà: “Dëspieghene coma ch’a peul esse capità cost crimen”. ⁴Ël Levita, l’òm ëd la fomna ch’a l’era stàita sassinà, a l’ha pijà la paròla e a l’ha dit: “Mia concubin-a e mi i j’ero fërmasse an Ghibea ‘d Beniamin për passeje la neuit. ⁵Ij cap ëd Ghibea a l’han atacame ‘d neuit anserciand la ca ‘nté ch’i logiava. A l’avìo l’intension ëd masseme, e a l’han violentà mia concubin-a tant ch’a l’é mòrta. ⁶Anlora mi i l’hai ciapà sò còrp e i l’hai squartairalo, mandand-ne ij tòch për tut ël teritòri dl’ardità d’Israel, dagià che coj ëd Ghibea a l’avìo comëttù un crìmen e n’infamia mai vëddùa anans an Israel. ⁷É-lo che vojàutri i seve pa tuti d’Israelita? Donca discùtne e parlene adess ambelessì”.

⁸Anlora tut ël pòpol a l’é aussasse coma ‘n sol òm e a l’han dit: “Gnun ed nojàutri a tornerà a soa tenda nì a soa ca ⁹e i faroma contra Ghibea conform a lòn ch’a diso le sòrt^[1]. ¹⁰I serneroma des òm da minca sent, e mila da minca desmila an tra tute le tribù d’Israel. Costi-sì a sërcheran ëd proviande për l’armeja ch’a ‘ndran contra Ghibea ‘d Beniamin për castijé l’infamia ch’a l’ha comëttù an Israel.

¹¹A l’é parèj che j’Israelita a son butasse ansema, tuti aleà coma ‘n sol òm për andeje contra a cola sità. ¹²Le tribù d’Israel a l’han mandà d’emissari për tuta la tribù ‘d Beniamin për dije: “Com é-lo che an tra ‘d vojàutri a l’é comëttusse ‘n tal crìmen? ¹³Consegnene sùbit coj dësgrassìa ch’a stan a Ghibea, parèj ch’i peudo masseje e parèj purghé Israel da cost maleur”. Mach che ij Beniaminita a l’han pa vorsù scoteje ij sò frej israelita, ¹⁴tant che, da tute soe sità ‘d lor, ij Beniaminita a son concentrasse a Ghibea con la determinassion ëd feje guèra.

Guèra contra ij Beniaminita

¹⁵Col di a son concentrasse vintesses-mila òm vajant d’arme, acorù da tute le borgià dij Beniaminita, sensa conté j’abitant ëd Ghibea, ch’a l’han concentrà setsent òm sernù. ¹⁶An tra tuta cola tropa a-i era setsent guerié mancin antrenà special. Minca un ëd lor a podìa, con soa fronda ‘d frapé la pì cita sibla sensa manchela. ¹⁷Da soa banda ‘d lor, j’Israelita, sensa conté ij Beniaminita, a l’han concentrà quatsent mila combatent d’esperiensa dë spa e ‘d guèra. ¹⁸J’Israelita a son montà a Betel për consultesse con Dé. A l’han ciamaje: “Col ch'a l'é ëd nojàutri che montera-lo për prim a combate contra dij Beniaminita?”. Nosgnor a l'ha rësponduje: “Giuda a sarà an testa!”. ¹⁹Passadoman bonora, j’Israelita a son acampasse an facia ‘d Ghibea. ²⁰A son surtì për ataché ij Beniaminita, an rangiandse, pront a la bataja, dë 'dnans ëd Ghibea. ²¹Ij Beniaminita a l'han atacà da Ghibea e an col di a l'han massà vintedoi mila òm d'Israel. ²²Arpijandse corage, j’Israelita a l’han torna formà l’órdin ëd bataja ant l’istess leu ch’a l’avìo falo ‘l di anans. ²³J’Israelita, contut, a son ëvnùit a pioré ëdnans ëd Nosgnor fin-a sèira, peuj a l’han consultà ‘l Signor an disend: “L’omne pròpi da torné a fé guèra contra ij Beniaminita, ij nòstri frej?”. E Nosgnor a l’ha rësponduje: “Torneie!”. ²⁴An col second di, donca, j’Israelita a l’han torna atacà ij Beniaminita. ²⁵Meno che, na vira 'd pì, ij fieuj ëd Beniamin a l'han tacaje da Ghibea e sterminà disdeut mila combatent Israelita, tuti vajant ëd la spa. ²⁶Anlora tuti j’Israelita, l’armeja antrega, a son portasse a Betel. Ambelelà, astà a la presensa dël Signor, a l’han piorà e digiunà për tut col di-lì e a l’han smonuje ‘n sacrifissi d’olocàust e ‘d sacrifissi ‘d comunion.

²⁷J’Israelita a son montà për ciamé al Signor lòn ch’a l’avìo da fé; anlora l’Èrca dl’Aleansa as trovava an col leugh, ²⁸e Pineas, fieul d’Eleasar, fieul d’Aron, an col temp-là a prestava servissi a Nosgnor. Lor a l’han dit: “Dovrìo-ne seurte na vira ‘d pì për combate contra dij nòstri frej beniaminita, o nò?”. Nosgnor a l’ha rësponduje: “Tacheje! Përchè doman mi i-j butrai an podej ëd vòstre man”.

Derota dij Beniaminita

²⁹Anlora Israel a l'ha piassà d'òm a l'avàit tut d'antorn ëd Ghibea. ³⁰Ël di apress, a l’era ‘l ters di, a son surtì për ataché ij Beniaminita e a son butasse an formassion ëdnans ëd Ghibea pròpi com a l’avìo fàit anans. ³¹Ij Beniaminita a l’han fàit na surtìa e a son ëslontanasse da la sità, lassàndla sensa difèisa. Giusta com a l’avìo fàit anans, a son ancaminasse a frapé dur ij sò nemis. Na tranten-a d’Israelita a son ëstàit massà an sla stra ch’a men-a da Betel a Ghibea a camp dovert. ³²Ij Beniaminita, parèj, a l’han pensà ch’a l’avèisso butà ‘n derota j’Israelita coma la prima vira. Mach che j’Israelita a l’avìo arseivù l’òrdin espress dë scapé për tiré ij Beniaminita lontan da la sità an sla stra maestra. ³³Anlora tuti j’Israelita a l’han chità soe posission ëd lor e a son butasse pì andaré a Baal-Tamar. An col moment j’Israelita stërmà a l’avàit a son sautà fòra da sò pòst, a ponent ëd Ghibea. ³⁴Des mila òm sernù da tuta Israel a son presentasse dë 'dnans ëd Ghibea, e ‘l combatiment a l’é stàit motobin sosnù. Ij Beniaminita, contut, a l’avìo ancora pa capì che soa dësfàita ‘d lor a l’era darera dla pòrta. ³⁵Nosgnor a l’ha butà ‘n derota Beniamin ëdnans d’Israel: an col di-lì j’Israelita a l’han massà vintessinch mila Beniaminita, d’òm ch’a l’ero bon a combate. ³⁶Anlora ij Beniaminita a l’han vëddù ch’a l’avìo përdù la bataja.

Da l’àutra banda, la rimanensa dj’Israelita a l’ha ancora përdù teren ai Beniaminita perchè a contavo an sj’òm amboscà contra 'd Ghibea. ³⁷J’amboscà a l’ero dëspiegasse an pressa e a l’ero lansasse contra dla sità. A l’han tacala e passà a fil dë spa tùit ij sò abitant. ³⁸J’Israelita a l’ero acordasse ‘d fé ‘n segnal a j’amboscà: costi-sì, rivà ch’a sarìo drinta dla sità, a l’avrìo fane monté na fumada gròssa. ³⁹J’Israelita a l'avrìo dovù viresse andaré e contrataché a col segnal. Beniamin a l'avìa ancaminasse a frapé j'Israelita: a l'avìa già massà na tranten-a d'òm; a disìo: gnun dùbit, lor a son an derota parèj dël combatiment passà. ⁴⁰Ma 'l segnal, na colòna 'd fum, a ancaminava a aussesse da la sità, e Beniamin, virasse andaré ch’a l’era, a l'ha vëddù che la sità a brusava tuta antrega con ël feu vers ël cel. ⁴¹Cand che j’Israelita a son virasse andarera, ij Beniaminita a son fasse pijé da lë sparm përchè lor a podìo vëdde 'l maleur che a stasìa për riveje. ⁴²Anlora a son tirasse andaré dë 'dnans ëd la gent d’Israel e a son ëscapà anvers la stra dël desert. Mach che j'òm d'Israel a-j andasìo dapress e j'àutri, tornà da la sità, a l'han sarà ij Beniaminita an mes, sbarajàndje.

⁴³Sircondà ch'a son ëstàit ij Beniaminita, a l'han seguitaje sensa sosta da Nocah^[2] anientàndje dë 'dnans ëd Ghibea da la banda 'd levant. ⁴⁴Ij tombà ëd Beniamin, an col di, a son ëstàit disdeut mila, tuti guerié vajant. ⁴⁵Ij survivù, viraje le spale al nemis, a son ëscapà ant ël desert, anvers ël Priòch ëd Rimon. Ma j'Israelita a l'han massane sinch mila për la stra. Peui a son andàit anans a steje dapress fin-a a Ghidom, an massand-ne d'àutri doimila. ⁴⁶Col di-lì, vintessinch mila dla gent ëd Beniamin, vajant ëd la spa, a son tombà an bataja, tuti guerié coragios. ⁴⁷Mach sessent òm a l'han faila a scapé, virand le spale e ciapand la stra dël desert, e a l’han trovà sosta al Ròch ëd Rimon. A son restà ambelelì për quat mèis. ⁴⁸J'òm d'Israel a son tornà a le sità beniaminite e a l'han passà a fil dë spa tuti j'abitant mas-cc. A l'han dëstrovù tute le sità abità^[3] e fin-a 'l cabial e tut lòn ch'as podìa trovesse. Tute le sità ch'as trovavo an Beniamin a son ëstaite brusà.

Nòte

1. Ebràich: "contra 'd chila a sòrt ". A l'é fàcil che 'l verb "i androma ansima" (נַעֲלֶה, na'aleh) a sia stàit pa butà për assident anans ëd "contra 'd chila" (עָלֶיהָ,'aleha).
2. La tradussion a presupon la letura מִנּוֹחָה (minnocah, "da Nocah", cfr 1 Crònache 8:2) pitòst che 'l מְנוּחָה dël TM (menocah, "leu d' arpòs").
3. La tradussion as basa an sla letura 'd מֵעִיר מְתִים (me'ir mëtim, "da na sità d'òm", valadì, "na sità abità"), pitòst che la letura מֵעִיר מְתֹם (me'ir mëtom, "da na sità 'd solidità" ) trovà ant ël Còdes ëd Leningrad (L).