La Bibia piemontèisa/Testament Vej/Geremia/Geremia 41

←Geremìa 40

La Bibia piemontèisa Geremìa

Geremia 42→

Geremìa

41

Godolia a l’é sassinà

¹Dël mèis ch'a fà set, Ismael, ch’a l'era fieul ëd Natania, fieul a soa vira d'Elisama, e che për lòn a l’era ‘d famija real e an tra j'eminense dël rè, a l'era vnùit con des òm a fé na vìsita a Godolia, fieul d'Achicam, an Mispa, e antramentre ch’a mangiavo ansema, ²Ismael, fieul ëd Natania, e ij des òm ch’a l'ero con chiel, a son alvasse e a l'han frapà dë spà Godolia, fieul d'Achicam, fieul ëd Safan, valadì: a l'han massà col che 'l rè 'd Babilònia a l'avìa stabilì tanme governator dël pais. ³Ismael a l'ha 'dcò massà ij Giudé ch'a l'ero con Godolia al festin, e ij Caldé, òm ëd guèra ch’as trovavo ambelelà^[1].

⁴Ël di dòp che Godolia a l'era stàit massà, dova che gnun a në savìa ancora nen, ⁵a son rivaie da Sichem, da Silo e da la Samaria, otanta òm con la barba rasà, le vestimente s-ciancà e dë scarificassion da deul, an portand an man ëd present e d'ancens për fene oferta ant ël Templi 'd Nosgnor. ⁶Ismael, fieul ëd Natania, surtì ch'a l'era da Mispa, a l'é andaje ancontra an piorand, e rëscontrandje, a l'ha dije: “Vnì da Godolia, fieul d'Achicam”. ⁷Ma cora che a son ëstàit ant ël mes ëd la sità, Ismael, fieul ëd Natania, e j'òm ch’a l'ero con chiel, a l'han massaje e peui a l'han campaje ‘ndrinta 'd na sisterna. ⁸Contut, a son stàine des ëd lor che a l'han dije a Ismael: “Va pa a massene, përchè i l'oma an campagna 'd provision ëd gran, d'òrdi, d'euli e d'amel ch’i podrìo dete”. Antlora chiel a l'ha risparmiaje e a l'ha nen faje meuire con ij sò amis ëd lor. ⁹La sisterna andova che Ismael a l'avìa campà ij còrp dj'òm massà, a l'é cola ch’a l’avìa fàit fé rè Asa contra 'd Basa, rè d'Israel. Ismael, fieul ëd Natania a lavìa ampinìla 'd cadàver.

¹⁰Peui a l'ha fàit përzoné tuta la rimanensa dla gent ch'a l'era an Mispa e le fije dël rè, che Nabusaradan, cap ëd le vàrdie, a l'avìa dàit an guerna a Godolia, fieul d'Achicam. Ismael, fieul ëd Natania, la matin bonora a l'é partiss-ne për andé ant ël pais dj'Amonita. ¹¹Ma Joanan, fieul ëd Careca, e tuti j'ufissiaj che a l'ero con chiel, pen-a ch'a l'han sentù dl'amassidi che Ismael, fieul ëd Natania a l’avìa fàit, ¹²a l'han butà ansema tuta soa gent e a son partì contra d'Ismael, fieul ëd Natania. A l'han trovalo aranda dla sisterna 'd Ghibeon. ¹³Cora che tut ël pòpol, ch'a l'era con Ismael, a l'ha vëdù Joanan, fieul ëd Careca e tuti j'ufissiaj, ch'a l'ero con chiel, a son ëstàit content ëd vëdd-je. ¹⁴E tuti costissì, che Ismael a l'avìa fàit përsoné an Mispa, virasse andaré, a son tornà e a son giontasse dré a Joanan, fieul ëd Careca. ¹⁵Mach che Ismael, fieul ëd Natania, a l'ha fàila a scapé con eut òm dë 'dnans a Joanan, e a l'é andàit ant ël pais dj'Amonita.

¹⁶Përparèj che Joanan, fieul ëd Careca, e tuti j'ufissiaj ch'a l'ero con chiel, a l'han assemblà tuta la rimanensa dël pòpol, che Ismael, fieul ëd Natania, a l'avìa portà fòra da Mispa, dòp d'avèj massà Godolia, fieul d'Achicam: òm, fomne, masnà e j'ufissiaj dla cort che Ismael a l’avìa pijà con chiel apress ch’a l’avìa massà Godolia. ¹⁷Chiel a l’ha portaje al vilagi ‘d Gherut ëd Chinam, ant j'anviron ëd Betlem, për peui andé anans con ël viage e intré n'Egit. ¹⁸A l’avìo tëmma, an efet, ëd lòn ch’a l’avrìo podù feje ij Babilonèis cand ch’a l’avèisso savù che Ismael a l’avìa massà Godolìa, butà dal rè ‘d Babilònia al govern ëd la tèra 'd Giuda.

Nòte

1. 41:1-3 cfr, 2 Rè 25:25.