La Bibia piemontèisa/Testament Vej/Genesi/Genesi 25

←Genesi 24

La Bibia piemontèisa Genesi

Genesi 26→

25

La Bibia piemontèisa - Génesi 25

Fijolansa ‘d Chetura

¹Abraham a l’avìa pijasse 'dcò n’àutra fomna ch’a l’avìa për nòm Chetura. ²Chila a l’ha daje costi fieuj-sì: Zimram, Iocsan, Modan, Madian, Iabach e Suach. ³Iocsan a l’ha generà Sheba e Dedan e ij fieuj ëd Dedan a son ëstàit j’Assurita, ij Letusita e ij Leumita. ⁴Ij fieuj ëd Madian a j'ero Efa, Efer, Anoch, Abida e Elda. Tuti sti-sì a son ij fieuj ëd Chetura.

⁵Abraham a l’ha daje tùit ij sò beni an ardità a Isach. ⁶Për lòn che nopà a rësguarda ij fieuj dj’àutre fomne, soe concubin-e, che Abraham a l’ha avù, a l’ha daje ‘d present e, antramente ch’a l’era ancora an vita, a l’ha licensiaje, mandandje lontan da Isach sò fieul, anvers levant, ant la region oriental.

Mòrt d’Abraham

⁷Abraham a l’ha vivù sentestantessinch agn. ⁸Peui Abraham a l’é mòrt a n'età mura, apress ëd na vita longa e pien-a 'd sodisfassion. A l'é donca spirà e a l’é giontasse ai sò grand ant la mòrt. ⁹A l’han sotralo ij sò fieuj, Isach e Ismael, ant la balma ‘d Macpela, ant ël camp d’Efron, fieul ëd Zocar, l’Hitita, an facia a Mamre, ¹⁰E giusta ant ël camp che Abraham a l’avìa catà da j’Hitita^[1] che a son ëstàit sotrà Abraham e soa fomna Sara. ¹¹Dòp ëd la mòrt d’Abraham, Nosgnor Dé a l’ha benedì Isach, ël fieul ëd chiel, e a l’ha abità davzin al poss ëd Lacai-Roi.

Fijolansa d’Ismael

¹²Costa-sì a l’é la fijolansa d’Ismael, fieul d’Abraham, ch’a l’avìa partorije Agar, l’Egissian-a, serva ‘d Sara. ¹³Sti-sì a son ij nòm dij fieuj d’Ismael, con soa lista an ordin ëd generassion: ël prim nassù d’Ismael a l'é stàit Nebaiot, peui Chedar, Adbel, Mibsam, ¹⁴Misma, Duma, Massa, ¹⁵Adad, Tema, Ietur, Nafis e Chedma. ¹⁶Costi-sì a son j’Ismaelita e costi-sì a son ij sò nòm ëscond ij sò vilagi e campament. A son ij dódes fondator d’autërtante tribù.

¹⁷La durà dla vita d’Ismael a l’é stàita ëd sentetrantesset agn, peui a l’é mòrt e a l’é giontasse ai sò grand ant la mòrt. ¹⁸Chiel a l’ha abità da Evila fin-a a Sur, ch’a l’é arlongh ël confin d’Egit an diression d’Assur. Chiel a l’è stabilisse an facia a tùit ij sò frej. A l’é là ch’a son vivù da nemis ëd tùit ij sò parent, dissendent d’Abraham.

Giacòb e Esaù

¹⁹Costa-sì a l'é la stòria^[2] d'Isach fieul d'Abraham. Abraham a l'era 'l pare d'Isach. ²⁰Quand che Isach a l'é rivà a quarant' agn, a l'é mariasse con Rebeca, la fija 'd Betuel, l'Aramé, da Padan-Aram, e seure ëd Laban, dcò chiel Aramé. ²¹Isach a l'ha pregà Nosgnor për soa fomna, përché chila 'd masnà a podìa nen avèjne. Nosgnor a l'ha scotà soa preghiera e soa fomna Rebeca a l'é restà ansinta.

²²Le masnà a l'era coma ch'as rusèisso andrinta a soa pansa, e a l'ha dit: "Se le còse a saran sèmper parèj, i son nen sicura ch'i vorìa esse torna an condission!" Anlora a l'ha ciamaje a Nosgnor dël përchè 'd lòn ch'a-j capitava. ²³Nosgnor a l'ha rësponduje: "An tò vènter a-i son doe nassion, e doi pòpoj andrinta 'd ti a saran divìs. Un pòpol a sarà pì fòrt che l'àutr, e 'l pì vej a sarà 'l servitor dël pì giovo^[3]. ²⁴Quand ch’a l'é rivà për Rebeca 'l temp ëd caté, a son surtì da sò vènter doi binèj. ²⁵Ël prim a l'era tut coatà 'd plucc ross coma s'a fussa na vesta 'd pèil. Anlora a l'han ciamalo Esaù. ²⁶Aprèss a l'è surtì sò frel. Cost-sì a l'avìa na man ch'a tenìa s-ciass ël garèt d'Esaù e a l'han ciamalo Giacòb. Isach a l'avia sessant' agn quand  ch’a son nassuje cole masnà.

²⁷Quand ch’ ij fiolin a son chërsù, Esaù a l'é dventà 'n cassador vajant, n'òm ch'a-j piasìa dë sté ant ij camp, e Giacòb a l'era pitòst n'òm pacìfich ch'a-j piasìa dë sté ant le tende. ²⁸Isach a vorìa pì bin a Esaù, përché a chiel a-j piasìa 'l zibié, ma Rebeca a vorìa pì bin a Giacòb.

²⁹Ore, Giacòb a l'avìa cusinà dla supa, e quand che Esaù a l'é tornà dai camp a l'avìa fam. ³⁰Anlora a l'ha dit a Giacòb: "Dame 'n pòch ëd cola supa rossa - eh, sa ròba rossa - përch' i son afamà" (Cost-sì a l'é 'l motiv përché chiel a l'é 'dcò ciamà Edom). ³¹Ma Giacòb a l'ha replicà: "Prima vend-me tò drit a la primagenitura". ³²"Varda," a dis Esaù, "I l'hai tanta fam da meuire. I sai nen còsa fene 'd na primagenitura^[4]". ³³Ma Giacòb a-j dis: "Fame adèss un giurament". Anlora Esaù a l'ha faje 'n giurament e a l'ha vendù a Giacòb sò drit a la primagenitura^[5]. ³⁴Anlora Giacòb a l'ha dàit a Esaù dël pan e dla supa 'd lentìe. Esaù a l'ha mangià e beivù, peui a l'é aussasse e a l'é surtì. A l'é parèj che Esaù a l'ha dëspresià sò drit a la primagenitura.

Nòte

1. Cfr. Génesi 23:3-16.
2. O “fijolansa”.
3. Cfr. Roman 9:12.
4. O "Còs i farajne mi dla primogenitura?".
5. Cfr. Ebréo 12:16.