La Bibia piemontèisa/Testament Neuv/Tessaloniceis/2Tessaloniceis 3

←2 Tessalonicèis 2

La Bibia piemontèisa Litre ai Tessalonicèis

1 Timòt 1→

2 Tessalonicèis

La Bìbia piemontèisa - 2 Tessalonicèis 3

3

Preghiera e përseveransa

¹A la fin, car ij mè frèj e seur, preghé për nojàutri, për che la paròla ‘d Nosgnor a së spantia e ch’a sìa glorificà coma ch’a l’é an tra ‘d voi. ²Preghé ‘dcò ch’i sio liberà da ‘d gent fastidiosa e maléfica, përchè nen tuti a son ëd chërdent. ³Nosgnor, contut,  a l’é fedel; chiel av rendrà fòrt e av goernrà dal malign^[1]. ⁴Ëdcò i l’oma la fiùsa an Nosgnor ch’i feve e ch’i seguité a fé tut lòn ch’iv comandoma. ⁵Che Nosgnor a veuja guidé vòstri cheur a l’amor ëd Nosgnor e a la përseveransa ch’a ven dal Crist.

Travajé e fé ‘l bin

⁶Iv arcomandoma ‘dcò, a nòm ëd Nosgnor Gesù Crist, d’artireve da qualsëssìa frel cristian ch’a viva ‘d manera dësregolà, da fagnan, e nen conform a la dotrin-a^[2] ch’i l’eve arseivù da nojàutri. ⁷I seve bin, an efet, ch’i l’eve da imité nòst esempi. An tra ‘d voi nojàutri i vivìo nen dësregolà coma ‘d fagnan, ⁸I l’oma mai acetà d’arsèive da mangé da vojàutri a gratis. I l’oma travajà dur dì e neuit për nen esse ‘d pèis a vojàutri. ⁹E nen përchè i l’avio pa ‘l drit d’esse mantnù, ma përchè i vorìo deve n’esempi da imité, ¹⁰An efet, mentre ch’i j’ero con vojàutri i l’avìo dave costa nòrma: “Chi ch’a veul nen travajé, ch’a mangia ‘dcò nen”.

¹¹A l’é che i l’oma sentì dì che cheidun ëd vojàutri a viv ëd manera dësregolà, sensa travajé, ampaciand-se ‘d lòn ch’a lo riguarda nen. ¹²A tùit coj-lì i-j comandoma e i-j arcomandoma an Gesù Crist, ël Signor, ch’a travajo an pas për vaniesse ‘l pan ch’a mangio. ¹³Ma për vojàutri, car frej e seur, tralassé mai ëd fé ‘l bin.

¹⁴E se cheidun a ubidiss nen a lòn ch’i disoma an costa litra, felo conòsse^[3] e àbie gnun-e relassion con collì, përchè ch’a n’àbia onta. ¹⁴Contut, considerelo nen tanme ‘n nemis, ma avertilo coma ‘n frel.

Conclusion

¹⁶Che ‘l Signor dla pas medésim av daga soa pas an tùit ij moment e an tote le manere. Nosgnor a sìa con tuti vojàutri.

¹⁷Costa salutassion i l’hai scrivula pròpi mi, Pàul, ëd mia man. A l’é parèj ch’i buto la firma a tute mie litre.

¹⁸Che la grassia ‘d Nosgnor Gesù Crist a sìa con tuti vojàutri.

Nòte

1. O “dal diav”, “dal mal”.
2. O “la tradission”.
3. O “marchelo con ël dìl”.