La Bibia piemontèisa/Testament Neuv/Tessaloniceis/2Tessaloniceis 2

←2 Tessalonicèis 1

La Bibia piemontèisa Litre ai Tessalonicèis

2 Tessalonicèis 3→

2 Tessalonicèis

La Bìbia piemontèisa - 2 Tessalonicèis 2

2

Lòn ch’a rivrà anans la vnùa ‘d Nosgnor Gesù Crist

¹Për lòn ch’a l’ha da fé con la vnùa^[1] ‘d Nosgnor Gesù Crist e ‘l moment ëd nòst rëscontr^[2] con chiel, iv pregoma, frej e seur, ²ch’iv lasse nen bolvërsé fàcilment o buté an agitassion da coj ch’a diso che ‘l Dì ‘d Nosgnor a l’é vzin a rivé. Chërdje nen, bele s’a pretendo d’avèj arseivù da lë Spirit na vision, n’arvelassion, o na litra ch’a l’han fala passé për nòstra. ³Lasseve nen ambrojé, a fà nen chi ch'a sìa, përchè anans ëd lòn a l’ha da vnì l’apostasìa^[3] e a l’ha da arvelesse l’Òm dël pëccà^[4], ël Fieul ëd la përdission^[5]. ⁴Collì a sarà n’esaltà ch’a farà d’opossion a tut lòn ch’a l’é stimà d’esse divin^[6] o sant. As butrà a stesse fin-a ant ël templi 'd Nosgnor e as farà passé për un dio^[7].

⁵Arcordevene pa che cand ch’i j’ero ancora ansema a vojàutri già tut sossì iv lo disìo bin? ⁶I seve bin che për ël moment a-i é cheicòsa ch’a lo traten, përchè ch’a sìa arvelà mach a sò temp^[8]. ⁷L’arvira contra la Lege 'd Nosgnor^[9] a l’é già an assion an manera limità^[10], ma cand che ij fren ch’a l’arten-o a-j saran gavà, ⁸antlora a s’arvelrà ciàir^[11] chi ch’a l’é l’Òm dl’arvira. Contut, Gesù, ël Signor, a lo farà meuire con ël bof^[12] ëd soa bòca^[13], l’anientrà con lë splendrior ëd soa vnùa.

⁹Cost òm a rivrà grassie al podèj ëd Sàtana^[14], e soa vnùa a sarà compagnà da ògni sòrt d’euvre potente, da segn e da miracoj^[15] ch’a son mach d’ambroj, ¹⁰e d’ògni sòrt ëd sedussion maléfiche për angané coj ch’a son destinà^[16] a la përdission, përchè ch’a l’han arfudasse ‘d voleje bin e d’arsèive la vrità ch’a l’avrìa salvaje. ¹¹A l’é për lòn che Nosgnor a-j manderà na potensa ch’a-j dëstravierà fasendje chërde a ‘d busiardarìe. ¹²A l’é parèj ch’a saran condanà tuti coj ch’a l’han pa chërdù a la vrità ma ch’a l’han pijà piasì a fé ‘l mal.

Destinà a la salvëssa

¹³Frej e seur amà da Nosgnor! I l’oma sèmper da dije mersì a Nosgnor për vojàutri, già che chiel a l’ha sernuve an tra ij prim për acordeve la salvëssa - na salvëssa ch’a l’é vnùa për ël mojen dlë Spirit, ch’av rend sant^[17] e për la fede ant la vrità. ¹⁴Nosgnor, për ël mojen dl’Evangeli ch’i l’oma nunsiave, a l’ha ciamave a arsèive la glòria ‘d Gesù Crist, ël Signor. ¹⁵Donca, frej e seur, tnive bin ferm e l’àbie an bon cont le dotrin-e ch’i l’oma mostrave ‘d përson-a e për litra.

¹⁶Ora, Gesù Crist midem, ël Signor nòstr, e Dé, nòst Pare, ch’a l’ha vorsune bin e ch’a l’ha acordane, për soa grassia, na consolassion eterna e na bon-a speransa, ¹⁷ch’a confòrta vòstri cheur e ch’av rinfòrsa con d’ògni sòrt d’euvre bon-e e ‘d bon-e paròle.

Nòte

1. O: artorn, advent, presensa [παρουσία (parousia)]. Cfr. 1 Tessalonicèis 4:15-17.
2. O: riunion, rescontr, ancontr [ἐπισυναγωγή (episunagógé)].
3. O “na granda arvira contra Nosgnor”.
4. O “l’Òm maléfich”.
5. O “col ch’a pòrta la dëstrussion”.
6. O “oget d’adorassion”. Cfr. Daniel 11:36; Esechiel 28:2.
7. O “as proclamrà Dé chiel istess”.
8. Përché ch’a sia nen manifestà anans ëd sò temp.  
9. O “anomìa”, let. “misteri dël mal”, l’assensa o mancansa ‘d nòrme, dëspressi o dësfida dla legalità o dla lej moral ëd Nosgnor, arvira.
10. O “implicita”, “coma dë scondion.
11. O “ëd manera esplicita”, “sensa fren”.
12. O "fià".
13. Cfr. Isaia 11:4.
14. O “a rivrà për fé l’euvra ‘d Satana”.
15. O “prodis”, cfr. Maté 24:24.
16. O "ch'a van"
17. O “ch’av santifica”.