La Bibia piemontèisa/Testament Neuv/March/March 2

←March 1

La Bibia piemontèisa Vangeli 'd March

March 3→

La Bìbia piemontèisa - March 02

2

Gesù a variss un paralìtich

¹A l'é passaje chèich di e Gesù a l'é tornà a Cafàrnao. La gent a l'avìa sentì che chiel a l'era antëcà. ²E sùbit a l'é radunasse tanta ‘d cola gent ch'a podìo gnanca sté 'nt lë spassi dë 'dnans ëd la pòrta, e chiel a-j nunsiava la Paròla. ³E dontré a son ëvnù da chiel an portand un paralìtich ch'a l'era sostnù da quat përson-e. ⁴E dagià ch'a podìo nen avzinesse për motiv ëd la furfa, a l’han dësquatà ël coèrt dël leugh andova a l'era Gesù e, dòp ch'a l'han fàit un përtus, a l’han calà giù ël paralìtich an sla sivera andoa ch'a l'era cogià. ⁵E Gesù, an vëdend la fede ch'a l'avìo, a dis al paralìtich: "Mè fieul, ij tò pecà at son përdonà". ⁶E chèich magìster ëd la Lege ch'a j'ero lì setà, a rasonavo tra 'd lor an sta manera-sì: ⁷"Sto-sì a bëstëmmia: a l'é mach Nosgnor ch'a peul përdoné ij pecà". ⁸Ma Gesù, ch'a l'avìa sùbit capì^[1] ch'a rasonavo parèi an tra 'd lor, a-j dis: "Përchè feve sti rasonament-lì^[2]?" ⁹Di-me 'n pò: còs é-lo ch'a l'é pi fàcil? Dì al paralìtich: Ij tò pecà at son përdonà, o ‘d dije: Àusste, pija su toa sivera e marcia? ¹⁰Ma përchè i sapie ch'ël Fieul ëd l'Òm a l'ha ël podèj an sla tèra 'd përdonè ij pecà - a dis al paralìtich - ¹¹Àusste, pija sù toa sivera e vatne a toa cà". ¹²Anlora col òm a l'é sùbit aussasse e, avend pijà sù soa sivera, a l'é surtì ën presensa 'd tuti, ëd manera che a j'ero tuti sburdì e a dasìo glòria a Nosgnor, an disand: "I l'oma mai vëddù na ròba parèj^[3]".

La vocassion ëd Levi

¹³Gesù a l'é torna surtì vers ël mar e tut ël pòpol a vnisìa con chiel e a j'andotrinava. ¹⁴E an passand, a vëdd Levi, fieul d'Alfeo, astà al bancon ëd la gabela, e a-j dis: "Ven-me dapress!" e Levi a l'é aussasse e a l'é andaje dapress.

¹⁵Peui a l'é capità che, cand che Gesù a l'era a tàola ant la ca 'd Levi, a-i j'ero 'dcò a tàola con Gesù e ij sò dissépoj tanti esator ëd le taje e 'd gent ëd cativa reputassion^[4] përchè lì a-i j'era tanta gent ch'a l'era andaje dapress. ¹⁶Ma ij magìster ëd la Lege e ij Farisé, an vëddend ch'a mangiava con coj dle taje e con ëd gent ëd cativa reputassion, a disìo aj sò dissépoj: "Përchè chiel a mangia e a bèiv ansem a coj dle taje e a 'd gent ëd cativa reputassion?". ¹⁷E Gesù, avenda sentì lolì, a-j dis: "A son nen coj ch'a stan bin ch'a l'han da manca del médich, ma coj ch'a stan mal. I son nen ëvnù a ciamé al pentiment dij giust, ma dij pecador".

Na chestion a propòsit dël digiun

¹⁸Ora, ij dissépoj ëd Gioann e coj dij Farisé a digiunavo, e a son ëvnùit da Gesù e a l'han dije: "Përchè ij dissépoj ëd Gioann e coj dij Farisé a digiun-o e ij tò dissépoj a digiun-o nen?". ¹⁹E Gesù a l'ha rësponduje: "J'amis ëd lë spos peulo-ne fé digiun antant che lë spos a l'é con lor? Antant che lë spos a l'é con lor, a peulo nen digiuné. ²⁰Contut, a vniran ij di che lë spos a-j sarà portà via e antlora, an coj di lì, lor a faran digiun. ²¹Gnun a cus un tacon dë stòfa neuva a un vestì frust, desnò ël tacon dë stòfa neuva a s-cianca la veja e 'l përtus a resta pì grand. ²²E gnun a buta ëd vin neuv andrinta dij botaj^[5] vej, desnò ël vin neuv a romp ij botaj, ël vin a së spatara, e ij botaj as perdo: ël vin neuv a venta butelo 'ndrinta a 'd botaj neuv.

Ij dissépoj a cheujo 'd gran ëd Saba

²³A l'é rivà peui che, antant che Gesù a travërsava un camp ëd gran ëd Saba, ij sò dissépoj a son butasse a cheuje dë spi^[6]. ²⁴E ij Farisé a l'han dije: "Ma varda-là: përchè coj-là fan-ne lòn ch'a l'é nen consentì 'd fé al di 'd Saba?". ²⁵Ma chiel a-j dis: "I l'eve mai lesù lòn ch'a l'ha fàit Dàvid cand ch'a l'era ant lë bzogn e ch'a l'avìa fam, chiel e coj ch'a j'ero 'nsema a chiel? ²⁶Coma ch'a l'é intrà ant la cà 'd Nosgnor, ant ël temp d'Abiatar, cap ëd tuti ij sacerdòt, e a l'ha mangià ëd pan consacrà, col ch'a l'era mach consentì ai sacerdòt ëd mangene, e a l'ha fin-a dane a coj ch'a j'ero con chiel^[7]?". ²⁷Peui a l'ha dije: "Ël Saba a l'é fàit per l'òm, e nen l'òm për ël Saba". ²⁸A l’é parèj che ël Fieul ëd l'Òm a l'é signor fin-a dël Saba.

Nòte

1. O "ch'a l'avìa sùbit conossù an sò spirit ch'a rasonavo parèi...", è: "Che l'avia la percession...".
2. As peul giontese: "ant ij vòs cheur".
3. "sburdì": a rend ëd pì l'idèja dla maravija che "stupì".
4. O "pecador".
5. Antlora a j'ero nen ëd botaj, ma dë recipient ëd pel.
6. Cfr. Deuteronòmi 23:25.
7. Cfr. Levìtich 24:9; 1 Samuel 21:1-6.