La Bibia piemontèisa/Testament Neuv/Gioann Litre/1Gioann 1

←2 Pero 3

La Bibia piemontèisa Litre 'd Gioann

1 Gioann 2→

La Bìbia piemontèisa - 1Gioann 1

Prima litra 'd Gioann

1

Pròlogh

¹Sossì a l'é lòn ch'iv nunsioma: lòn ch'a l'era fin-a dal prinsipi^[1], lòn ch'i l'oma sentù, lòn ch'i l'oma vëddù con nòstri euj, lòn ch'i l'oma contemplà e che nòstre man a l'han tocà. As trata^[2] dla Paròla dla vita. ²Përchè la vita a l'é an efet manifestasse: nojàutri i l'oma vëddula^[3] e i në rendoma testimoniansa, iv nunsioma la vita eterna ch'a l'era con ël Pare e che peui a l'é stane arvelà. ³A vojàutri, donch, i nunsioma lòn ch'i l'oma vëddù e sentù, përchè 'dcò vojàutri i sìe an comunion con nojàutri, ch'i l'oma comunion con ël Pare e con sò Fieul Gesù Crist. ⁴Parèj, i vë scrivoma coste ròbe përché nòstra gòj a sia compléta.

Nosgnor a l'é lus

⁵Sto-sì a l'é 'l messagi ch'i l'oma sentù da Gesù e che adess iv nunsioma: che Nosgnor a l'é lus e ch'a-i é gnun top an chiel. ⁶S'i disoma ch'i soma 'n comunion con chiel, ma, an efet, i vivoma^[4] 'nt lë scur, i soma mach ëd busios e i vivoma pa nen conform a la vrità. ⁷Tutun, s'i vivoma 'nt la lus tanme chiel a l'é 'nt la lus, i soma 'n comunion l'un con l'àutr, e 'l sangh ëd Gesù, sò Fieul, an purifica 'd minca 'n pecà^[5]. ⁸S'i disoma ch'i l'oma fàit gnun pecà, i 'ngabioloma mach noi midem e i vivoma nen ant la vrità. ⁹Contut, s'i confessoma^[6] ij nòstri pecà, Nosgnor, ch'a l'é fedel e giust, an përdonrà ij pecà e an purificherà da tut lòn ch'a l'é pa giust^[7]. ¹⁰S'i disoma ch'i l'oma fàit gnun pecà, a l'é coma s'i disèisso che Nosgnor a dis ëd busiardarìe e cola-lì a sarìa la dimostrassion che soa paròla a trova pa 'd pòst an nòstra vita^[8].

Nòte

1. Cfr. Gioann 1:1.
2. O "iv parloma".
3. Cfr. Gioann 1:14.
4. O "i marcioma.
5. O "la vrità a l'é nen an noi".
6. O "arconossoma".
7. O "da ògni 'ngiustissia".
8. O: "an nojàutri", "an nòstri cheur".