La Bibia piemontèisa/Testament Neuv/Gioann/Gioann 17

←Gioann 16

La Bibia piemontèisa Gioann

Gioann 18→

Gioann

17

La Bìbia piemontèisa - Gioann 17

Gesù a prega 'l Pare 'd glorifichelo

¹Gesù a l’ha dit ëste còse e peui, an aussand j’euj al cel, a dis: “Pare, l’ora a l’é vnùa; glorifica tò Fieul, parèj che tò Fieul at daga glòria^[1], ²pròpi coma ti 't l’has daje autorità an sl’umanità antrega, për ch’a daga vita eterna a tuti coj ch’ it l’has daje.

³Ora, costa-sì a l’é la vita eterna: ch’a conòsso ti, ch'it ses ël sol e ver Dé, e ch’a conòsso Gesù Crist, col che ti 't l’has mandà. ⁴Mi i l’hai date glòria an sla tèra: i l’hai compì^[2] ‘l travaj che ti ‘t l’avìe dame da fé. ⁵Adèss, Pare, rend-me glòria an toa presensa^[3], la glòria che mi i l’avìa press ëd ti già da prima che 'l mond a fussa creà.

Gesù a prega për ij sò dissépoj

⁶I l’hai fàit conòsse^[4] tò Nom a j’òm^[5] che ti 't l’has fidame dal mond. A l’ero ij tò, e ti ‘t l’has damje, e lor a l’han ëscotà toa Paròla. ⁷Adèss a l’han capì che tut lòn ch’it l’has dame a ven da ti ⁸përchè i l’hai daje le paròle che ti 't l’has dame. Lor a l’han arseivuje^[6] e për dabon a capisso^[7] che mi i son ëvnù da ti e a chërdo che ti 't l’has mandame.

⁹Mi i prego për lor; i prego nen për ël mond, ma për coj che ti ‘t l’has dame, përchè a son ij tò. ¹⁰Tut lòn ch’a l’é mè, a l’é 'l tò, e lòn ch’a l’é 'l tò, a l’é mè, e lor a l’han dame glòria^[8]. ¹¹Adess i son pì nen ant ël mond, ma sti-sì a resto ant ël mond, e mi i 'rtorno da ti. Pare sant, guernje an tò Nom, coj, i diso, che ti ‘t l’has dame, parèj ch’a sio un coma nojàutri i soma un^[9]. ¹²Cand ch’i j’ero ansem a lor (ant ël mond) i-j goernavo an tò Nòm. I l’hai goernà coj ch’it l’has dame, e gnun ëd lor a l’é ‘ndàit përdù fòra ‘d col-là ch’a l’era destinà a perd-se^[10], parèj che la Scritura a podèissa esse compìa. ¹³Adess, nopà, i ven-o da ti, e i diso ste còse 'nt ël mond përchè mia gòj a sia compìa an lor. ¹⁴I l’hai daje toa Paròla e ‘l mond a l’ha avuje an ghignon përchè lor a son nen dël mond, pròpi coma mi i son nen dël mond. ¹⁵I prego nen che ti i-j gave vìa dal mond, ma ch’it i-j ten-e lontan dal mal. ¹⁶Lor a son nen dël mond pròpi coma mi i son nen dël mond^[11]. ¹⁷Ch’a sio dedicà a la vrità^[12]: toa Paròla a l’é vrità. ¹⁸Coma ti ‘t l’has mandame, mi i l’hai mandà lor ant ël mond. ¹⁹E mi 'm dédico a lor^[13], parèj che ‘dcò lor a sio përdabon dedicà (a mi).

Gesù a prega për ij chërdent dontsessìa

²⁰Ora i prego nen mach për lor, ma ‘dcò për coj ch’a chërdran an mi për ël mojen ëd soa paròla. ²¹përchè a sio tùit un, pròpi coma ti, Pare, it ses an mi e mi an ti. I prego che lor a sio an nojàutri, përchè ‘l mond a chërda che ti ‘t l’has mandame. ²²I l’hai daje la glòria ch’it l’has dame për ch’a sio un, tanme nojàutri i soma un – ²³Mi an lor, e lor an mi - ch’a sìo un an manera completa^[14], parèj che ‘l mond a conòssa che ti ‘t l’has mandame e ch’it jë veule bin, tanme ti ‘t l’has vorsùme bin.

²⁴Pare, mia anvìa për coj ch’it l’has dame a l’é che andoa ch’i son mi, a sio ‘dcò lor, parèj che lor a vëddo mia glòria, cola ch’it l’has dame motobin anans ëd la creassion^[15] dël mond. ²⁵Pare giust, ël mond a l’ha nen conossute, ma mi i l’hai conossute, e sti-sì a l’han conossù ch’it ses ti ch’it l’has mandame, ²⁶e mi i l’hai faje conòsse tò nòm, e i seguitraj a fejlo conòsse, përchè l’amor ch’it l’has avù për mi a sia an lor e mi an lor”.

Nòte

1. O “at glorìfica”.
2. O “portà a la fin”.
3. O “press a ti”.
4. O “i l’hai arvelà”.
5. Ambelessì “òm” l'é conservà coma tradussion ëd ἀνθρώποις (anthrōpois) pitòst che 'l pì generich "gent" përchè dal contest as arferiss ai 11 òm che Gesù a l'avìa sernù coma apòstoj (Giuda a l'era già partiss-ne, Gioann 13:30). As trata pa dël grop formà da òm e fomne.
6. O “osservà”.
7. O “a conòsso”.
8. O “a son stàit onorà da lor”.
9. Visadì: Pare e Fieul ant la pien-a comunion dla divinità.
10. Let. “ël fieul dla perdission”, visadì Giuda. Salm 41:9; Gioann 13:18.
11. O “dal malign”, “dal diav”.
12. O “Fa-je sant con toa vrità”, “butje a part”.
13. O “Im faso sant për sò nom”.
14. O “santificà”.
15. O “fondassion”.