La Bibia piemontèisa/Testament Neuv/Filipeis/Filipeis 4

←Filipèis 3

La Bibia piemontèisa Filipèis

Colossèis 1→

La Bìbia piemontèisa - Filipèis 4

Filipèis

4

La pràtica dla vita cristian-a

¹Për costa rason-sì, mè car frej e seur, vojàutri ch'i-j veuj bin e ch'i vorìa tant vëdde 'd përson-a, vojàutri ch'i seve mia gòj e mia coron-a, sté ferm parèj ant ël Signor - mè car amis! ²I prego Evodia, e i prego 'dcò Sintiche d'andé d'acòrdi 'nt ël Signor. ³Éh, it lo diso 'dcò a ti, compagn sincer, giutje coma cole ch'a l'han combatù ansema a mi al servissi dl'Evangeli, con Clement e d'àutri mè colaborator^[1]: ij sò nòm a son ant ël lìber ëd la vita.

⁴Arlegreve sèmper an Nosgnor! Iv lo diso torna: arlegreve! ⁵Che tùit a vëddo vòstra dosseur^[2]. Nosgnor a artornerà tan-tòst^[3]. ⁶Feve nen ciapé da l'ansia, al contrari, an minca situassion, fé conosse a Nosgnor lòn ch'i l'eve damanca con ëd preghiere e 'd sùpliche, compagnà da d'assion ëd grassie^[4]. ⁷E la pas ëd Nosgnor, ch'a sorpassa nòstra^[5] comprension, a guernërà vòstri cheur e pensé^[6] an Crist Gesù.

⁸Dël rest, tut lòn ch'a l'é vera, tut lòn ch'a mérita onor, tut lòn ch'a l'é giust, tut lòn ch'a l'é pur, tut lòn ch'a l'é amàbil, tut lòn ch'a l'é 'd na bon-a nòmina, tut lòn ch'a l'é 'd valor e degn ëd làude, ch'a sìa l'oget dij vòstri pensé^[7]. ⁹Lòn ch'i l'eve amparà, arseivù, sentù, e vëddù an mi, butelo an pràtica, e 'l Dé dla pas a sarà con vojàutri.

Apressament për esse stàit giutà

¹⁰Ora i l'hai na granda gòj ant ël Signor perchè ora, a la fin, i l'eve torna manifestame vòstr anteressament. I lo sai bin che già da prima i-j pensave, ma i l'avìe nen avù la possibilità 'd felo^[8]. ¹¹I diso nen sossì per ch'i sìa 'nt l'indigensa, përchè i l'hai amprendù a contenteme dla condission anté ch'i son. ¹²I sai vive tant ant le privassion^[9] coma 'nt l'abondansa. An tut e për tut i l'hai amprendù a contenteme, sia cand ch'i j'era sodisfàit che cand ch'i l'avìa fam, sia cand ch'i l'avìa tant che cand ch'i l'avìa pòch. ¹³I peuss fé tut an Crist ch'am na dà la fòrsa. ¹⁴A l'é parèj, ma tutun i son content ch'i l'àbie giutame^[10].

¹⁵I seve 'dcò, vojàutri Filipèis, che cand ch'i l'hai comensà a serve l'Evangeli, cand ch'i l'avìa chità la Macedònia, gnun-a cesa a l'avìa partessipà al rësguard ëd cost "dé e arsèive" a ecession ëd vojàutri,  ¹⁶përchè cand ch'i j'ero a Tessalònica^[11], i l'eve mandame cheicòs an vàire ocasion për provëdde ai mè bzògn^[12]. ¹⁷A l'é nen ch'i diso parèj përchè i serco 'd feme dé 'd cadò, ma perchè i serco lòn ch'a serv për fé fruté vòstr patrimòni^[13].

¹⁸I l'hai arseivù tut lòn ch'i l'hai da manca e lòn a l'é assè^[14]. Cand ch'i l'hai arseivù lòn ch'a l'ha portame Epafrodito da vòstra part, i son ëstàit ampinì dij bin: a l'é stàit coma 'l bon odor^[15] ch'a seurt dai sacrifissi che a Nosgnor a-j piaso e che chiel a j'aceta. ¹⁹E mè Dé a suplirà, da soe richësse, tut lòn che 'dcò vojàutri i l'eve damanca, për la glòria 'd Gesù Crist.

²⁰Ora, a nòst Dé e Pare sia glòria 'nt ij sécoj dij sécoj. Amen!

Salut finaj

²¹Saluté ciaschëdun dij sant an Gesù Crist. I frej ch'a son ansema a mi av saluto. ²²Tùit ij sant av saluto e dzortut coj ch'a son ëd la famija 'd Cesar.²³ La grassia 'd Nosgnor Gesù Crist a sia con tuti voi. Amen!

Nòte

1. O "compagn d'euvra".
2. O "gentilëssa", "moderassion".
3. O "ël Signor a l'é davzin".
4. Dimostrassion d'arconossensa.
5. O "minca comprension", "ògni inteligensa".
6. O "ment".
7. O  "pensé a cole còse", "ch'a sìa lòn ch'i pense".
8. O "felo".
9. O "umiliassion".
10. O "pijà part a mia aflission".
11. Cfr. At 17:1.
12. 4:15-16 cfr. 2 Corint 11:9.
13. O "ël frut che a peuda esse butà a vòstr crédit", visadì "i veui ch'i feve l'esperiensa dle benedission ch'a ven-o da l'esse generos".
14. O "I son ant l'abondansa".
15. O "fragransa". Cfr. Surtìa 29:18.