La Bibia piemontèisa/Testament Neuv/At/At 6

←At 5

La Bibia piemontèisa J'At dj'Apòstoj

At 7→

La Bìbia piemontèisa - At 06

J’At dj’apòstoj

6

A stabilisso dij diàconi

¹An coj dì lì, coma ch’a chërsìa ‘l nùmer dij dissépoj, ij Giudé ‘d lenga greca ch’a j’ero an tra ‘d lor a son lamentasse dij Giudé ‘d lenga ebràica përchè soe vidoe a j’ero lassà da banda^[1] ant ël servissi ordinari dla distribussion dle vivande^[2]. ²Parèj ij Dódes a l’han ciamà ansema tùit ij dissépoj e a l’han dije: “A va nen bin che nojàutri i lasso da banda la predicassion ëd la Paròla ‘d Nosgnor për butesse a fé ij taulegiant.³Vardé, donca, ij mè frèj, ëd serne set òm tra ‘d voi ch’a l’àbio na bon-a arputassion, pien dë Spirit Sant e ‘d saviëssa: a lor i-j daroma cola responsabilità-lì. ⁴Për lòn ch'a riguarda nojàutri, i seguitroma a ocupesse dla preghiera e dël servissi dla Paròla”. ⁵Col discors-lì a l’é piasuje a tuta l’adunansa ch’a j’era lì present. Parèj a l’han fàit l’elession ëd Stevo - n’òm pien ëd fede e dë Spirit Sant - Flip, Pròcoro, Nicànore, Timon, Parmena, e Nicòla, n’òm d’Antiochia ch’a già a l’avìa convertisse al Giudaism^[3]. ⁶A l’han presentaje a j’apòstoj che, dòp d’avèj pregà, a l’han faje l’imposission ëd le man.

⁷La Paròla ‘d Nosgnor a seguitava a propaghesse^[4] e ‘l nùmer dij dissépoj a chërsìa motobin an Gerusalem, e fin-a ‘n gran nùmer ëd sacerdòt giudé a acetava^[5] la fede.

Stevo a l’é arestà

⁸Ora Stevo, pien ëd fede e ‘d potensa, a fasìa ‘d gran miracoj e ‘d gran prodis an mes al pòpol. ⁹Ma cheidun ëd la Sinagoga dij S-ciav Liberà, coma ch’a l’era ciamà, a l’é butasse a fé ‘d discussion con chiel. Coj-lì a j’ero ‘d Giudé da Cirene, Lissandria, Cilicia e dla provincia dl’Asia. ¹⁰A podìo nen contrarié^[6] la saviëssa e lë Spirit ch’a parlava për sò mojen. ¹¹Anlora a l’han sobornà cheidun ch’a disèissa: “I l’oma sentilo bëstëmmié contra Mosé e contra Nosgnor”. ¹²Parèj a l’han cissà na solevassion dël pòpol e la reassion dij notabij^[7] e dij magister ëd la Lege e a l’han falo aresté, e a l’han ëmnalo dë 'dnans al Consej. ¹⁴Ambelelà a l’han presentà dij testimòni fàuss ch’a disìo: “St’òm-sì a chita nen ëd fé 'd discors ch’a son mach ëd bëstëmmie contra ‘l Templi sant e contra la Lege. ¹⁵Nojàutri i l’oma sentije dì che col Gesù ‘d Nasareth a dësblerà ‘l Templi e ch’a cangerà le ordinanse ch’a l’ha dane Mosé!”.

¹⁶Coma tuti coj ch’a l’ero astà ant ël Consej a l’avìo j’euj fiss an sù Stevo, a l’han vëddù soa facia splendrienta coma cola ‘d n’àngel.

Nòte

1. A j’era na discriminassion.
2. O “d’agiùt ai pòver”.
3. O “un prosélita”.
4. O “a chërsìa”.
5. O “a fasìa ubidiensa”.
6. O “arziste”.
7. O “dj’ansian”.