Dumini Badalin/Mòrt d'un bòss

Artorn

---

Mòrt d'un bòss

 

L’han ëslongà sla stra un mandarin,
l’é cascà ’n tèra con ses colp adòss
e l’han ëscoèrt ch’a l’era un di ’s bòss
ëd la mala organisà ’d mesa Turin
e ’d coj stërmà ch’a san a fesse sente.
N’òmo d’onor però, giùdes dij làder,
pare ’d famija, conosseur ëd quàder,
un sicilian rivà da là con gnente
che a fòrsa ’d rusché sèch e fé ’l gamalo
l’era vnù ’n cap ant l’organisassion.
As ved ch’a l’ha sercà ’d fërté ’l padron
e parèj për castighé a l’han ëscursalo.
Regolassion dij cont an sël travaj,
l’é pròpe na costuma dë sta gent,
na veja tradission ëd tut l’ambient,
ma coj fòra dël gir a savran mai
nì le rason, nì ’l nòm ëd col ch’a-j tron-a,
nen sempre ’n bòss a meuir ant ël sò let,
s’a maron-a quaicòs, perde ’d respet,
a l’é sùbit mandà sël cors Torton-a.
Eh! Eh cara gent, fé ’l bòss
l’é n’arzigh gròss,
për boneur calabrèis e sicilian son piasse ’s badò,
j’àutri italian, vorèisso bin, a podrìo nen fé ’l bòss,
përchè a l’han pa l’onor a portà ’d man
che ’l mandarin a l’ha për tradission
e ch’a l’é ’n chiel come na vocassion,
për sòn ij bòss a son sempre ’d maraman
e l’han pa bzògn d’avèj dë studi gròss.
J’ero dj’analfabet ij primi bòss,
ma a son ëstàit bon a fé la società
che a fòrsa ’d serne ’d përsonal
ëd lor sensa na lira ’d capital versà
l’ha ’n gir d’afé an tute le sità
e ancheuj l’é società dj’òmo d’onor.
A bzògna amprende da sta società
ch’a ven sù coma n’erbo pien d’arbut
con ij branch ch’a s’anfilo daspërtut,
amprende da sti òmo specialisà,
travajeur generos, ch’a pioro mai,
ma ch’a san cò cudì sò bel mësté
slongand un bòss aranda al marciapé,
përchè l’ha fàit ëd mës-ce an sël travaj
screditand ant j’afé la società
dal bòss pì gròss a coj ch’a dòvro ’l tron.
Mach parèj n’asienda a buta bon,
mach s’a ’s fà fòra ij poj ch’a l’ha ’nt ëca
e peui a bzògna avèj la convinsion
che a-i va pròpi gnun studi për riesse,
basta vorèj decis e peui campesse,
vorèj a conta ’d pì che l’istrussion.
L’han ëslongà ’n sl’asfalt un mandarin,
tramblé nen maraman, a l’era ’n bòss
ch’a l’ha fàit un pòch tròp ël bòss balòss
a l’é cambiaje gnente sì a Turin,
rusié, rusié, n’j’é ancora prima dl’òss.