Vittorio Bersezio/Le miserie 'd monsú Travet/pàgina 59
| ←pàgina 58 | Le miserie 'd monsú Travet |
| Artorn - La grafìa a l'é nen cola moderna ma cola dovrà dal Bersezio. |
Sena ultima
'L Comendator e detti.
'L COMENDATOR A m'përmëtne?... Forsse i j dësrangio, ma sicoma j'eu 'na bôna neuva da deje, monssú Travet, i son ampressame a vnijla a porté.
TRAVET 'Na bôna neuva?
GIACHËTTA (Ahi! ch'j'eu paura che chiel sí a vena a guastene la frità).
'L COMENDATOR Sí sgnor, 'na bôna neuva. A côl inconvenient c'a j'è suceduje stamatin, a l'è tut rimedià.
GIACHËTTA (S'j'eu dilo!)
MADAMA TRAVET Da bôn?
TRAVET Ma ant che manera c'a l'è rimedià?
'L COMENDATOR J'eu parlà mi con 'l Ministr... Ant côl prim moment i son stait d'co mi cosí sbalordí da côla calunia... j'era persuadume che chiel con quaich ciancia a l'aveissa daje ansa... j'era cosí indispetí ch'j'eu d'co parlaje a chiel un po' brusch... I lo prego d'përdoneme. Ma peui a sang freid, informandme mei coma c'a l'ero le cose, j'eu vist che chiel a n'avia nsun tort. I son dunque andait adritura dal Ministr e j'eu faje conosse la vrità. 'L Cap session a l'è nominà fora d'Turin... e chiel a l'ha côla promossion c'a j ven.
TRAVET Da bôn!... côla promossion ch'i speto da tanti ani! Finalment a l'è vnua!...
GIACHËTTA (I sôma bele andait).
TRAVET Comendator, mi i lo ringrassio tant.
'L COMENDATOR I spero c'a acetrà...
TRAVET S'a fussa arivà un moment prima... chi sa?... i saria magara lassame tiré, ma adess i m'treuvo ligà da 'na mia parola... E peui j'eu trovà 'na posission c'a m'dà d'pi d'guadagn, e pensand a mie masnà i l'aceto ancorché a sia forse nen tant brillant...
GIACHËTTA Oh! un bel brillant c'a l'avia prima! (Paolin a lo calma).
'L COMENDATOR Dunque?
TRAVET Dunque i ciamreu lon c'a m'ven d'giubilassion e i m'artiro.
'L COMENDATOR I peus nen deje tort...
GIACHËTTA E mi i dagh rason gross coma 'l brass. Bravo, monssú Travet! A vedrà c'a s'na pentirà nen.
TRAVET Tanto pi s'i vëdreu mia famia fortunà. C'a vena sí Paolin. Marianin avsinte... Dé sí vostre man. (A j'uniss) I seve spos.
GIACHËTTA Finalment!
PAOLIN Oh! che boneur!
BRIGIDA (fasendse ananss) Tota Marianin, adess c'a buta sú cà, c'a m'pia mi për soa serva.
GIACHËTTA Ah! për lolí no. Pié, sí a j'è le sent lire ch'i j'eu promëtuve, ma j'andreve a sërché fortuna da 'n'autra part.
BRIGIDA Përchè?
GIACHËTTA Përchè? Ciameilo a monssú Barbarot... Paolin, comenssa a feje un regal, nen a la sposa, ma al messé. Tè (a j dà la mostra d'Travet). Noiaitri i fôma moda neuva.
PAOLIN Sí, me car, monssú Travet... me car papà... c'a m'përmétta ch'i j presenta... sí a j'è 'na mostra che...
GIACHËTTA I spero c'a la riconossrà!
TRAVET Mia mostra!... Mia povra mostra! Ma coma c'a l'ha chiel?
GIACHËTTA A l'è semplice. I sôma andala a dësgagié e j'ôma portaila.
TRAVET Ah! i sperava nen d'arvëdla cosí prest... Oh! che piasí!... Ah! a l'ha dame 'na vera sodisfassion.
GIACHËTTA Ben, ben: parlômne pi nen.
'L COMENDATOR I j fas le mie congratulassion. A m'smia che sta sí për chiel a finissa për esse una felice giornà.
TRAVET Sí; e i chërdo d'podei dí che da sto moment a son finije le miserie d'monssú Travet.
Fin d'la comedia