Vittorio Bersezio/Le miserie 'd monsú Travet/pàgina 44
| ←pàgina 43 | Le miserie 'd monsú Travet |
pàgina 45→ |
| Artorn - La grafìa a l'é nen cola moderna ma cola dovrà dal Bersezio. |
Sena sconda
'L Comendator e Travet.
'L COMENDATOR C'a m'chërda a mi, monssú Travet, 'l mei c'a peussa fé a l'è deje soa fia a côl fieul. Dislo pa c'a l'è brav e rich?
TRAVET Sí sgnor (a l'avrà un gran rolò d'carta an man).
'L COMENDATOR Dunque a l'è un partí c'a j saria sempre convnuje an tuti ij cas. Adess peui, dop la sena c'a j'è staie jer seira, a m'smia c'a dev desiderelo pi che mai sto matrimoni.
TRAVET Ma vëdlo, a l'è che côl fieul... oh! a j'è pa nen a dije su so cont... ma, cosa veullo? a l'è d'una certa estrassion...
'L COMENDATOR Coma sarijlo a dí? Apartenlo nen a 'na famia onesta?
TRAVET Për onesta sí, ma nen motoben... capisslo?
'L COMENDATOR Gnente d'autut.
TRAVET Nen a me livel.
'L COMENDATOR An che manera?
TRAVET Për dijla an doi parole, so pare a l'era panaté, e chiel a l'è ancora socio con 'l sucessor d'so pare.
'L COMENDATOR E ben? lolí cosa c'a j fa?
TRAVET A j smijlo nen che un impiegato regio a perda d'so decoro a dé soa fia a un panaté?
'L COMENDATOR Eh! che 'l decoro a s'perd an fasend d'cose disoneste e nen për côle mincionarie lí. A l'è côl un difet d'na gran part d'la borsoasia, d'avei d'côle certe superbie senssa rason vers la classe d'ij artisan e d'ij botegari. A j'è gnun mësté onest c'a sporca e c'a disonora, e quand che un a l'ha l'educassion, qualunque industria comasdev c'a esercita, a l'è l'ugual d'chissisia. Noiaitri borsoà i s'lamentôma d'la nobiltà quand c'a n'trata con orgolio e c'a tira a fene capí d'esse quaicosa d'superior a noiaitri; e peui i fôma l'istess e peg con côi c'a son o c'a smia c'a n'sio d'sota. Che diao! Esse impiegato regio a l'è sicura 'na cosa onorevol, ma a n'dà nen 'l drit a dispressé tute le autre condission.
TRAVET Sor Comendator... Certo che soe parole a l'han motoben d'peis për mi... Anssi i dirai ch'j'avia già pénsaje d'co mi, un po' pi all'ingross, a côle cose, e ch'j'era già quasi për decidme... tanto d'pi che la fia a na saria contenta... Ma, cosa mai? mia fomna a veul nen a gnun cost.
'L COMENDATOR Soa fomna con d'bône rason a s'convincérà...
TRAVET Oh! sí! A convinci chila lí ci vuol altro che d'bône rason.
'L COMENDATOR An fin d'ij cont, soa fomna, lí, a l'ha da 'ntreje për poch. A l'è pa la mare d'la tota. A l'è chiel c'a l'è so pare, c'a dev dispone d'la fia.
TRAVET A l'è giust.
'L COMENDATOR E peui ant soa cà 'l padron a dev esse chiel.
TRAVET Sí... i dévria... ma an fatto peui... i chërdo c'a l'è mia fomna c'a finissa për fé tut lon c'a veul.
'L COMENDATOR E lolí a l'è un mal... C'a m'scusa s'i j parlo da bôn amis.
TRAVET Oh! lo prego, sor Comendator, chiel a m'onora.
'L COMENDATOR Ant la famia a l'è certo che la fomna a dev avei n'influenssa e 'na considerassion maggior d'côla c'a j dan tanti. Ma se ant un menage a l'è mal che la fomna a sia tratà coma 'na serva, a l'è d'co mal che l'omo a s'lassa comandé... c'a m'permétta l'espression, mné për 'l nas.
TRAVET I chërdo c'a l'abia rason, ma...