Salve Valtingòjer/In principium erat verbum

In principium erat verbum

IN PRINCIPIO ERAT VERBUM ...

Ti, Pare Nòstr
Pensé etern, Paròla vera
che già it j’ere prima ancor
dla neuit nuitera
dël temp dij temp,
për Tò volèj
e Tò savèj
na gòla it l’has creà,
afoà,
tra temp e eternità sospèisa,
fongà ‘nt la neuit pì scura,
tut feu e fòrsa pura,
spërdua ant ël gnente,
corma ‘d particole arbuijente:
griseul ëd l’univers.

“FIAT LUX!”

it l’has ordinà, Ti,
Ùnich Concet, Spirit inmens,
che a j’era, che a l’é e che a-i sarà.
Al Tò comand,
për Tò podèj
e përtò volèj
da col griseul squarsà,
ant un deliri ‘d lus
ësfòrgo sbalucant
a son precipitasse
a invade‘l gnente.

“ET LUX FUIT"