Rino Serra/Tèra mìa/13

←Rondolin-a

Rino Serra - Tèra mìa, amìa mìa

Dik→

Piemont II

An nòstr Piemont l'é vera
Le montagne
A son na còsa, ch'a fan
Maravìa,
Però guardoma 'dcò
Soe bele pian-e
A son nen pròpi peui
Da campé via.
Pensé a sta pian-a, fàuda
Ed nòstr Piemont
Pensé a sta pian-a e...
Tnim-la da cont;
Pensé a Versej
E a soe risere,
A piat ed ris
Fàit an pì manere,
Magara da ranette
Contomià.
Pensé al nòstr Bielèis
A Oropa
Ant el verd dij coj d'antom
Bin angrignà,
Pensé a la Langa, Alba
E al vin ch'a stopa
Pensé ai brich e vaj
Che a-i son là;
Pensé a la soa gent drùa
E goregna
Ch'a rusca pròpi tant
Come danà
E a tui ij travaj s'adata
E peui s'angigna
E gòd ed sò travaj
Ma gieugh ed masnà.
Guardé Turin e sò gieugh
Ed colin-e e eve,
ij sò palass
E le soe drite stra,
Pensand soa stòria peuli
Ancaplineve
E resté 'mbajà
Ed soa regia maestà;
Superga lassù a n'àut
Fà da coron-a,
Dij mont bianca caden-a
L'amperzon-a.
Coni Madama 'n fond
Ed la pian-a
Ai pé 'd dosse montagne
As desdavan-a;
Provincia granda, granda
E verament
Per el gran cheur ch'a bat
Drin a soa gent.
Àich con soa bujenta
Misinòira
E con j'arcòrd ed veja
Roman-a stòria.
Ast argin-a del Monfrà
Ëd sò biond amant Gelosa, bel farine!
Dal nòm Spumant. Lissandria e Noara
Anvers Milan
Ma sempre Piemontèise ...
Bariera d'Alman;
Ant la stòria veja e neuva
Ëd nòstr Piemont
L'é sempe lì ch'a s'àussa
An àut la nòstra front.
Ivrea d'Arduin mare,
Prim Re d'Italia
Che pasia 's cun-a al gargh
Andé dla Dòira
Là 'nvers al pian leugn...
Pien ed lus espàlia,
Campagna drùa squarsà
Da la slòira.
Salusse e 'l Marchesà
Con soa stòria
Pensand ai temp andà
Viv ed soa glòria.
A-i é peui Mondvì,
Fossan Nissa dla paja
Casal con Pinereul Bra
E àutre sent sità
E peui j 'é Raconis
Che fòrt a braja
"Da mi 'l re d'Italia
L'ùltim l'é nà".
Susa stra Europenga
E 'l sò valon
Ch 'as duerta oltra ij vàlich
An tèra 'd Fransa,
L'é lì cogià ai pé
Del Ròciamlon
E 'd soa Madòna
Ch'a l'é viva speransa.
Fradlansa dle colin-e Monfrà
e Langa Fradlansa fra le pian-e
E j 'àuti mont
Antersià dai cors ed j 'eve
E ij sudor ed vanga,
L'é tut sonsì ch'a forma
Nòstr Piemont!