Rino Serra/Eva

Artorn

---

Eva

Pì sclinta, pì frësca,
Pì sombra e pì dossa...
Che eva!

Eva...
Turbijon ëd cascade
Ch’ampinisso la ment,
Eve corìe che meusie, che fòrte,
Che sclinte, che frësche,
Che sombre, che càude,
Arsonante...
Eve stissante da fiòche
E da giasse përdùe
Ant ël temp.
Eve stissante ch’a calo
Da nivole sombre dij cej;
Eve dle nebie pì fin-e
Ëd l’otogn ant le vigne,
Eve dij fium e bialere
Ch’a marco sta tèra
Ëd Piemont.

Eva,
Paròla ch’arlegra mè cheur,
Vera sostansa dla vita
Ch’am pòrta frëscura
Con tut sò calor!