Remigio Bertolino/Pèi dj'erbo

Pèi dj'erbo

Pèi dj’erbo
che d’ënvern
àusso ij branch
al nìvole ’d fiòca
ël le stànsie strece (1)
al silensi ciamoma pietà
dël serp ëd fregg (2) ch’i monto
longh ël rastel dla schin-a
a tormentene, a tentene...

E peu
ël man dla sèira
dësglin-o (3) ël faseu dla lun-a
da la Molarissa,
ch’a pissa soa lus giana (4)
sla cuverta strassà.
A scauda nen ël frà g-rà (5)
ëd nòstre man
che in sero la facia
come j’erbo là feura
ël biòch6 drinta ij branch
al vent dla neucc.

Da «Stanse d’ënvern»- 2006

Nòte

(1) strece = streite;
(2) fregg = frèid;
(3) dësglin-o = dësgreujo;
(4) giana = giàuna;
(5) g-rà = geilà;
(6) biòch = bion