Pinin Pacòt/Arssivoli

Arssivoli

Bliñblaña blañbliña
blañbliña bliñblaña,
l’è avsiña, lôntanña
la vôs cantariña;
che ’nt l’aria a spatara
dle note lucente,
e ’nt l’àninma it sente
sôné côsì cara;
che drinta at dësvija
le rime pi bele,
che peuj të sbardele
’nt la strofa fiôrija?

Blañbliña bliñblaña,
s’ël serio, per rije,
tra seugn e fôlie
ël cheur a davaña.
Cheicosa të scianca
la vita ch’a passa,
la vita, ma ’t lassa
cheicosa pi bianca,
cheicosa ’d pi candi
dla fioca sle sime:
na nivôla ’d rime
ch’a stan per piè l’andi.

Viôlet e scarlata
l’è ’l cel sla môntagna:
la fioca, cômpagna
dla nivôla mata,
a smija ch’a cheuja
ël rôss ch’a sangôña.
Ant l’aria a frissôña
sutila na feuja.
E l’ômbra che adasi
a cala ’ns la vita,
al seugn a t’invita,
at cuña e ’t fa tasi.

An cel a j’è ’d voli,
ch’a passô e ’s lôntanô:
mi i seugnô e i bliñblañô
guardand j ’arssivoli.

Da Arssivoli 1926