Pier Luis ëd Barban/La vestimenta del Rè
La vestimenta del Rè modifiché
BASTIAN
Maestà, vòstre vestimente a son le pi bele ch’aj sia al mond.
A diso che gnanca ‘l Gran Kublàj Kan, imperator ëd tute le Cine, a l’abia nen dle vestimente parej.
GINO
Cò a j’intra ël cine?
At lo sai ben che ël nòst Rè a va nen al cine!
SEMPRÒNIO
Ma nò le…. Cine ò la Cina …ant l’Orient Lontan.. da l’àutra part dël mond. At capissi mai gnente… ti.
TUTI
Ah ecco …!
GINO
El nòst Rè a va nen a cassa, a fa nen vita mondan-a…
A l’han vist-lo ‘na vira o doe a l’òpera… ma vestì mal l’han mai vist-lo… l’è nen vera ?
SERENA
E peui a l’ha ‘na vestimenta për ògni ocasion e për ògni ora dël dì.
RE
E sì… la matin mi i but col satinà d’Olanda con jë stivalon (ëd vòlte a j’è ancora la rosà)
But anche ‘l capel ëd pann e ij causset ëd filanca.
El dòp-mesdì la redingòt ëd prinssi-‘d-Galles e ‘l giacotin bleu ‘d Prussia. Col ch’a portava Bismark (d’invern lo sostituìs con un mantel ëd lan-a vèrgine e ‘na scufia ëd lan-a merìnòs).
BIGNÒLA
E bravo ël nòst Rè ch’as lassa mai manchè gnente: vestimenta, stival, capei e scufie…
RE
Mi am pias vistime ben. Pitòst am privo ëd chejcòs d’àut, ma la vestimenta a dev sempi essi an …ordin.
…ma costa sarìa la stòfa ch’a l’ha consilià Borghini?
portela via, a fa sgiaj. L’è ‘n taf-tà volgar e brut.
COMÉS ED BORGHINI
Ma maestà l’è ‘l mej ch’as treuva ans ël mercà.. ël mej…
RE
Ciuto basta… veui pi nen savej-ne.
I peus pa andè ‘n gir vestì mal, magara con un ëd coj baracan ch’a deuvso ij soldà ò jë spissiari dël borg. Mi i son ël Rè. E s’im vesto mal mi, chi ch’a dev vestissi ben?
GINO
Na confidensa……. ! El Rè a tira fòra le vestimente anche second come aj gira la giornà…: nejr s’a l’è ëd cativ umor, ros se le còse aj van ben… viòla se tut a gira al contrari.
BASSTIAN
Varda com’a l’è vestì ancheuj… giàun? Còs’ a veul dì?
GINO
Giàun a veul dì ch’a l’è an-rabià con chijdùn… e s’a l’è giàun con ël colèt nejr a veul dì ch’a l’ha rusà con chijdùn dël clero: vësco, cardinal, abate…
MARCELIN
E giàun con ël focòl bianc
GINO
Alora a veul dì ch’a l’ha rusà con ël ….. PAPA!
RE
Chi ch’a l’è ch’am ciama?
SERENA
Un tessior ëd Cher
RE
Ch’a ven-a avanti, ch’a ven-a…..
TESSIOR ED CHER
I l’oma la mej teila da braje dla zòna: rigadon, taf-tà, scossèis. Ròba da fé invidia a chionque.
RE
Ben, pensava giusta ëd feme fé doj paira ‘d braje për andé a caval: stòfa arbusta… frustagna!
TESSIOR ED CHER
Tut lon ch’i veuli, i l’oma anche ëd teila da mudande …për l’intimità
RE
Sì, sì… pijo anche ij mudandon e, s’i l’eve, anche un camison da neuit……
Arda come son bel… i son pròpi bel, vestì com’as dev, nen come ‘l Duca ëd Toscan-a ch’a gira sempre vestì come n lader: brajasse ‘d teila grotolùa, giaca d’aulù maròn… la pi a sgagassa ch’aj sia an ël mond. Parloma nen dël capel.
Chiel-lì a l’ha sempre un caplàs molaciù e flap: tut voncc e pien ëd forfora dij cavej… che pen-a!
E ‘l Rè ‘d Baviéra. L’an passà l’heu scambialo për un venditor ëd bestje, ànssi l’heu dije… “ciao Gildo”. I l’heu confondùlo për Gildo Sgarivënna, col negossiant ëd Carù (dël part ëd Coni) che viravotà a ven da ste part a vende le bestje.
BASTIAN
Maestà a j’è un ëd Biela ch’a veul vendi da giaca e giacon…
GINO
Maestà a j’è un ëd Pavia ch’a ven ij fassolet
RE
Avantiii ch’a sio tuti ij ben-avnù
TESSIOR ED BIELA (un pòc crin…)
Mi i ven ij fassolet da nas… as na treuva gnun come ij nòstri an tuta Torlotònia, Torlomània e Boémia…vardé:
pr… pr… pr…… pr……
RE
Ma j’ùltim “ pr pr “ tl’hai faje co ël nas?
TESSIOR ED BIELA
Nò i l’heu nen faje con ël nas…
RE
Fòra brut crin, i veui pi nen vëd-ti; ma varda che element !
a j’intra un con facia dròla e con un prus o ”peretta“ an man e con un meter da murador… ch’a gira antorn a l’imperator e ai sofia aria da tute le part anche ant le part intime e a farfoja ‘d còse incomprensibil)
RE
Ma ti ch’i ch’at sei?
SAGOMA
Mi i pij tute le dìstanse per podej fèvi la DEPILAZIONE INDÒLÒRE
RE
Foooooraaaa !!!!!!
(aj riva ‘l cupio ch’a jë m-zura la vita,aj toca ‘l …daré, aj fa an pòche ‘d mòìne tut antorn..)
CUPIO
òh che bel ch’a l’è ‘l Rè... òhmmi… òhmmi
RE
Uéi-la mi son pa an VENDOLA…… via!
GINO
...a j’è doj ch’i l’heu mai vist, ch’a veulo parlé diretament con el Rè. Ch’a sio doj imbrojon?
MODESTINO
Ma va’ mostra ‘n pòc... veuj vëdi ch’i ch’a son!
AMBROJON
Noj i soma doj sartor ch’i vnoma da Pompei, ant ël Ream ëd Nàpoli, i soma ij pi ‘n piòta ch’aj sia.
GINO
Nen sempre ‘l Rè a l’è disponibil.. a j’è’l Secretari d’Estat ch’a pija nòta e ch’a riferis tut a soa Maestà. Andé da chiel
AMBROJON
Nò , nò… noi i voroma parlé con el Rè an person-a. L’è ‘na còsa bon ben amportanta.
BASTIAN
(a mi me smijo doj “falùrco”, da ‘ndoa a ven-ran?)
SERENA
(di’ nen parej.... coj ch’a son i vòstri nòm ….coj Monssù?)
AMBROJON
Noi i soma ri…pòcìòp.. ed …..rvas… e sp… ed svas….
BASTIAN
I l’heu capì gnente! Comonque acomodeve, chijdùn av darà da ment……
Ah ecco ‘l Rè….
AMBROJON
Maestà i soma sì për presenté nòstra produssion dë stòfa për vestimente. Però i l’oma ‘d ròba esclusiva e special e vorìo parleve an privà!
RE
Special?… Esclusiva? Ma avanti. Avanti!
AMBROJON
Nòstra stòfa a l’è nen mac strasordinaria për ël color e ‘l disegn, ma dcò për la magìa ch’a j’è andrinta sta stòfa! Stè antent Maestà… nòstra stòfa a l’è talment ecessional che coj ch’a capisso pòc, ch’a son ignorant ò beté a peulo nen vedla… ànssi a la vëdo pròpi nen! Donque a l’è ‘na stòfa mac për gent ch’a l’ha: inteligensa e sensibilità…
RE
Alora a l’è ‘na stòfa pressiosa për dabon!!! S’i but cola vestimenta-lì i podreu ancòrz-mi ëd tuti ij bon-a-nen e dij beté ch’a j’è ant ël mè ream… e – al contrari – i podreu conòssi tuti ij meritevol e j’inteligent…. ch’a j’è ‘n gir.
Fom-se sùbit fé sta vestimenta! Ah… ecco n’antìcip për le speise, pijé dcò dij biet ëd banca...
(ij doj ambrojon a fan mostra ed monté ‘l tlé….)
e nen contenet ëd pijé dij sòld a l’han vorsù anche dla teila fin-a, dla stòfa costosa e dij boton d’òr e del fil ëd prima quàlità…)
e peui a fan finta ëd cusi…
RE
I l’avrìa veuja ‘d savej a che mira ch’a son con cola vestimenta… ma se mi i fùssa peui ancora ‘na person-a fòla ò ‘n bon a nen i podrìa nen vedi cola famosa stòfa! A l’è mej ch’i manda ël mè prim ministr a guardé com’a van le còse.
Car prim ministr andé a vedi com’a proced la mia vestimenta magica e dime che impression ch’av fa e a che ponto a son rivà ij doj sartor…
PRIM MINISTR
Cristiandòr…. Ma mi i vedo pròpi nen d’autùt!
Ma alora i son un beté… n’aso.. un bon-a-nen… L’è mej ch’anventa ‘na bela relassion ansima l’andament dël travaj…
Vardé Maestà: ël disegn l’è pròpi bel, le rifinidure con ël fil d’òr: ecessional… ël vestì peui… ël vestì peui… a l’è ‘na maravija… as na vèd nen tanti parej. As na vèd pròpi gnun parej.
(però mi i l’heu vist pròpi gnente… Bah)
RE (ai sò colaborator)
Andè dcò voiàutri ch’i na capissi ‘d pi….
COLABORATOR
Noi më smija nen d’essi beté, e pura i vëdoma gnente ‘d gnente.
Ma l’è mej ch’i lo diso nen an gir desnò passoma për aso, borìc e beté…
Nota
oramai ant ël pais as parla nen d’àut che dla blëssa dla vestimenta dël Rè
TUTI
Maestà a l’è ‘n vestì ecessional, modern e antic ant l’istes temp, soagnà e sòbrio, ah … che bel.
…ma lon ch’a l’è pi anciarmant a son ij color, ël disegn e com’a l’han rifinì le picadure e ij fianc… mai vist ‘na ròba parej… pròpi mai vist-la!
Nota
Ij doj sartor a ciamo ancora: dl’arzan, … dij sòld…
RE
Deji, deji lon ch’a veulo…
Ades i vado dcò mi a vëdi!
RE
bel neh? ch’a varda ij color, ël disegn….
(bòja fàus ma mi i vèd gnente… alora i son beté dcò mi?)
òh òòòòòh
TUTI ANSEMA…
- bel - perfet - ecessional
(sena d’anventé).....
ël Re a gira për le strà an mudande con la gent ch’a së stopa ‘l nas për nen ghigné
final con tute le masnà ch’a taco crié… ma ‘l Rè l’è l’è patanùùùù ël RE l’è patanùùùù…!!!!
- Moral: “Si veuli savej la vrità, ciameila sempre ai cit”
(chijdùn a l’avìa scrvù ‘na ròba parej dal titol LE VISTIMENTE DL’IMPERATOR)
Pier Luisi ëd Barban - dzember 2011