Nino Costa/Le muraje pcite

Le muraje pcite

E mi son bele sì ’n tra quatr muraje
con në scartari1 dnans e l’àutr daré
ch’i vivo di për di le mie bataje
con le cifre, le pràtiche e ij dossié.

Quàich vòlta am ven-o an ment d’idee servaje,
i seugno ij brich, le nìvole, ij giassé
ma s’i penso a mia fomna e a mie maraje
’m arlegro ’d me travaj ch’a-j ten an pé.

Viva ti che ’nt la sercia dle montagne
it peule dësmentié farfo [2] e canaje
mentre it serne le rime e ’t je compagne,

ma ’ntant ch’it gòde ’l frèsch dle Gran Muraje
pensa a tante creature derelite
ch’a sudo ’n mes a quatr muraje pcite.

Nino Costa

Nòte

1) scartari = registro
2) farfo = imbecilli

Al poeta ing. Filippo Tartufari Cheneil Valtornenza Aosta Bòtta e risposta coi saluti e il ricordo di Nino Costa

31-7-942