Nino Costa/La macia rossa (Finlandia)
La macia rossa (Finlandia)
modifiché(Gené 1940)
Sle gran dëstèise, bianche, an cò dla tera
na macia rossa ëd sangh a tenz la fiòca,
e 'n son lontan come l’arciam d'na ciòca
a martla “Alarma!” ant ël fracass dla guèra.
J’é na cita nassion lìbera e fiera
ch’as bat për soe famije e sò pais
ma contra a l’ha na nìvola d'inimis
në strop sarvaj ch’a possa a la frontiera
e a son doi contra sent. Fin ch’a podran
a ten-o dur, ch’a-i é Nosgnor ch’a-j giuta
ma l’ëvnì a peul cambié ant na minuta…
Se ancheuj a vagno… a resistran doman?
Tra ij tron dle bombe e ij crij longh dle siren-e
la macia 'd sangh së slarga an mes dla fiòca…
D’antans antans as sent ël son d'na ciòca
ch’a-j crija al mond: “Giutène, gent giutène”.
Ma j’autre gent meno sincere e franche
studio ij contrat e a-j penso a l’antëresse…
E antant lassù, sle gran dëstèise bianche
… la macia rossa a séguita a slarghésse.