Nino Costa/La guèra
La guèra modifiché
A-i era na mama ch’a fasìa da sin-a
– dnans ël feu, contra ij rifless dla giòla –
e an pe, tacà la tàula, na gognin-a
ch’a tracopiava sò travaj de scòla.
Fòra, ant la sèira silensiosa e mòla,
j’erbo a l’avìo, dantorna la cassin-a,
col’aria d’atension profonda e dròla
come quand a-i é la pieuva ch’a s’ëvzin-a.
Na sman-a dòp, a l’istess pòst a-i era
mach pi le quatr muraje brusatà…
Tut ël rest fracassà, finì… la guèra!
Fognand ant ij vansroj dontré soldà
l’han trovà na cartela dë scòla
e në scartari strafognà për tèra.