Nino Costa/La Mòle

Artorn

---

La Mòle

Dròla, për lòn l'è dròla, anssi i dirïa
che, 'n fatto 'd monument e 'd costrussion,
gnanca 'nt la Cina, gnanca 'nt ël Giapon,
dròle parei… dificil ch'a-i na sìa.
S'i l'hai da dive la vrità, më smìa
n'elmo d'assel con sò bel ciò 'd loton
ch'a 'nfilssa con la ponta lë Steilon
për nen che 'l vent a-j lo rabasta vïa.
E pura quand ch'i rive da lontan
e i vëdde da la fnestra dël vagon
spontè la Mòle… - val a dì: Turin -
i sente 'n fond al cheur come 'n posson,
quaicòs ch'av fa chinè la front sla man
e i treuve, malgré tut, ch'i-j veule bin.